ಮುಂಬಯಿ: ಶತಮಾನೋತ್ಸವದ ಸಂಭ್ರಮದ ಹೊಸ್ತಿಲಲ್ಲಿರುವ ಮುಂಬಯಿಯ ಪ್ರತಿಷ್ಠಿತ ಬಂಟರ ಸಂಘವು ಇದೀಗ ಆಂತರಿಕ ಕಲಹ ಹಾಗೂ ಹಲ್ಲೆ ಪ್ರಕರಣದಿಂದಾಗಿ ತೀವ್ರ ಮುಜುಗರಕ್ಕೆ ಈಡಾಗಿದೆ. ಜಾಗತಿಕ ಬಂಟರ ಒಕ್ಕೂಟದ ಅಧ್ಯಕ್ಷರಾದ ಐಕಳ ಹರೀಶ್ ಶೆಟ್ಟಿ ಅವರು ‘ಬಂಟರವಾಣಿ’ ಪತ್ರಿಕೆಯ ಸಂಪಾದಕ ಅಶೋಕ್ ಪಕ್ಕಳ ಅವರ ಮೇಲೆ ನಡೆಸಿದ್ದಾರೆನ್ನಲಾದ ದೈಹಿಕ ಹಲ್ಲೆ ಸಮುದಾಯದ ಒಳಗೆ ದೊಡ್ಡ ಮಟ್ಟದ ಕಿಚ್ಚು ಹಚ್ಚಿದೆ.
ಘಟನೆಯ ಹಿನ್ನೆಲೆ: ಗೋರೆಗಾವ್ನ ವೆಸ್ಟಿನ್ ಹೋಟೆಲ್ನಲ್ಲಿ ಇತ್ತೀಚೆಗೆ ಆಯೋಜಿಸಲಾಗಿದ್ದ ವಿವಾಹ ನಿಶ್ಚಿತಾರ್ಥದ ಸಮಾರಂಭವೊಂದು ರಣರಂಗವಾಗಿ ಮಾರ್ಪಟ್ಟಿತ್ತು. ಕಾರ್ಕಳದ ಕಾಂಗ್ರೆಸ್ ನಾಯಕ ಮುನಿಯಾಲು ಉದಯ ಶೆಟ್ಟಿ ಹಾಗೂ ಐಕಳ ಹರೀಶ್ ಶೆಟ್ಟಿ ಅವರ ನಡುವಿನ ಶಬ್ದಸಮರವು ವಿಕೋಪಕ್ಕೆ ಹೋಗಿ, ಕೊನೆಗೆ ಪತ್ರಕರ್ತ ಅಶೋಕ್ ಪಕ್ಕಳ ಅವರ ಮೇಲಿನ ಹಲ್ಲೆಯಲ್ಲಿ ಅಂತ್ಯಗೊಂಡಿದೆ ಎಂದು ವರದಿಯಾಗಿದೆ. ಈ ಆಕಸ್ಮಿಕ ದಾಳಿಯಿಂದ ವಿಚಲಿತರಾಗಿದ್ದ ಅಶೋಕ್ ಅವರು ಆರಂಭದಲ್ಲಿ ದೂರು ನೀಡಲು ಹಿಂಜರಿದಿದ್ದರೂ, ಸಂಘದ ಇತರ ಮುಖಂಡರ ಬೆಂಬಲದೊಂದಿಗೆ ಮುಂಬೈ ಪೊಲೀಸರಿಗೆ ಅಧಿಕೃತ ದೂರು ಸಲ್ಲಿಸಿದ್ದಾರೆ.
ತೀವ್ರಗೊಂಡ ಆಕ್ರೋಶ ಮತ್ತು ಬಹಿಷ್ಕಾರ: ಈ ವರ್ತನೆಯನ್ನು ಖಂಡಿಸಿ ಸಾಕಿನಾಕಾದ ಹೋಟೆಲ್ ಮೆಟ್ರೋದಲ್ಲಿ ಮಹತ್ವದ ಸಭೆ ನಡೆದಿದೆ. ಮುಂಬಯಿಯ 9 ಪ್ರಾದೇಶಿಕ ಸಮಿತಿಗಳ ಪೈಕಿ 6 ಸಮಿತಿಗಳ ಪ್ರಮುಖರು ಈ ಸಭೆಯಲ್ಲಿ ಪಾಲ್ಗೊಂಡು, ಹಲ್ಲೆ ನಡೆಸಿದ ಹರೀಶ್ ಶೆಟ್ಟಿ ಅವರಿಗೆ ಸಂಘದ ಯಾವುದೇ ಕಾರ್ಯಕ್ರಮಗಳಿಗೆ ಆಹ್ವಾನ ನೀಡಬಾರದು ಹಾಗೂ ಅವರನ್ನು ಸಮುದಾಯದಿಂದ ದೂರವಿಡಬೇಕು (ಬಹಿಷ್ಕಾರ) ಎಂಬ ಕಠಿಣ ನಿರ್ಧಾರ ಕೈಗೊಂಡಿದ್ದಾರೆ. ಸಂಘದ ಉನ್ನತ ಸ್ಥಾನದಲ್ಲಿರುವವರಿಂದ ಇಂತಹ ಅಶಿಸ್ತು ತೋರುವುದು ಅಕ್ಷಮ್ಯ ಎಂದು ಮುಖಂಡರು ಗುಡುಗಿದ್ದಾರೆ.
ರಾಜಿ ಸಂಧಾನಕ್ಕೆ ಆಗ್ರಹ: ಸದ್ಯ ಬಂಟರ ಸಂಘವು ಮೂರು ಸ್ಪಷ್ಟ ಗುಂಪುಗಳಾಗಿ ಸೀಳಿದ್ದು, ಸದಸ್ಯರಲ್ಲಿ ಗೊಂದಲ ಮೂಡಿದೆ. ಮುಂದಿನ ಚುನಾವಣೆ ಹಾಗೂ ಅಧ್ಯಕ್ಷ ಸ್ಥಾನದ ಪೈಪೋಟಿಯೇ ಈ ಎಲ್ಲಾ ಸಂಘರ್ಷಗಳಿಗೆ ಮೂಲ ಕಾರಣ ಎಂಬ ಮಾತುಗಳು ಕೇಳಿಬರುತ್ತಿವೆ. ಪರಿಸ್ಥಿತಿ ಮತ್ತಷ್ಟು ಹದಗೆಡುವ ಮುನ್ನ ಸಮುದಾಯದ ನಾಲ್ವರು ಪ್ರಮುಖ ಸ್ವಾಮೀಜಿಗಳು ಹಾಗೂ ಹಿರಿಯ ಗಣ್ಯರು ಮಧ್ಯಪ್ರವೇಶಿಸಿ ಈ ಬಿಕ್ಕಟ್ಟನ್ನು ಶಮನಗೊಳಿಸಬೇಕೆಂದು ಸಮಾಜದ ಹಿತೈಷಿಗಳು ಮನವಿ ಮಾಡಿದ್ದಾರೆ.
