ಮಲ್ಪೆ: ಮೋಂಥಾ ಚಂಡಮಾರುತದ ಹಿನ್ನೆಲೆಯಲ್ಲಿ ಕಳೆದ 8 ದಿನಗಳಿಂದ ಸ್ಥಗಿತಗೊಂಡಿದ್ದ ಮಲ್ಪೆ ಬೀಚ್ನ ವಾಟರ್ ಸ್ಪೋರ್ಟ್ಸ್ ಮತ್ತು ಸೈಂಟ್ಮೇರಿಸ್ ದ್ವೀಪಕ್ಕೆ ಪ್ರವಾಸಿ ಬೋಟ್ ಯಾನ ಮತ್ತೆ ಆರಂಭಗೊಂಡಿದೆ. ವೇಗವಾಗಿ ಬೀಸುತ್ತಿದ್ದ ಗಾಳಿಯಿಂದಾಗಿ ಸಮುದ್ರದ ನೀರಿನ ಒತ್ತಡ ಹೆಚ್ಚಿದ್ದ ಕಾರಣ ಮತ್ತು ಪ್ರವಾಸಿಗರ ಸುರಕ್ಷತೆಯ ಹಿತದೃಷ್ಟಿಯಿಂದ ಈ ಸೇವೆಗಳನ್ನು ಸ್ಥಗಿತಗೊಳಿಸಲಾಗಿತ್ತು.
ಇದೀಗ ವಾತಾವರಣ ಸಹಜ ಸ್ಥಿತಿಗೆ ತಲುಪಿ ತಿಳಿಗೊಂಡಿರುವ ಹಿನ್ನೆಲೆಯಲ್ಲಿ ಬೀಚ್ನಲ್ಲಿ ಎಲ್ಲ ತರಹದ ಜಲ ಕ್ರೀಡೆಗಳನ್ನು ಮತ್ತೆ ಆರಂಭಿಸಲಾಗಿದೆ. ಮಲ್ಪೆ ಬೀಚ್ಗೆ ಜಲ ಕ್ರೀಡೆಗಳಿಗಾಗಿಯೇ ಬರುವ ಪ್ರವಾಸಿಗರಿಗೆ ಇದು ಸಂತಸ ತಂದಿದೆ ಎಂದು ವಾಟರ್ ಸ್ಪೋರ್ಟ್ಸ್ನ ನಿರ್ವಾಹಕ ಶಾನ್ರಾಜ್ ಮಲ್ಪೆ ಅವರು ಹೇಳಿದ್ದಾರೆ.
ದೀಪಾವಳಿ ಹಬ್ಬದ ರಜೆಯ ಹಿನ್ನೆಲೆಯಲ್ಲಿ ಹಲವಾರು ಪ್ರವಾಸಿಗರು ಸೈಂಟ್ ಮೇರಿಸ್ ಯಾನಕ್ಕೆ ಆಗಮಿಸಿ, ಅವಕಾಶವಿಲ್ಲದೆ ಹಿಂತಿರುಗಿದ್ದರು. ಇದೀಗ ಸಮುದ್ರವು ಸಹಜ ಸ್ಥಿತಿಗೆ ತಲುಪಿದ್ದು, ಶನಿವಾರದಿಂದ ಮತ್ತೆ ಯಾನ ಆರಂಭಿಸಲಾಗಿದೆ. ಬೆಂಗಳೂರು ಮತ್ತು ಮೈಸೂರು ಭಾಗದಿಂದ ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರು ಬರಲಾರಂಭಿಸಿದ್ದಾರೆ ಎಂದು ರಾಜರಾಜೇಶ್ವರೀ ಟೂರಿಸ್ಟ್ ಬೋಟ್ ಮುಖ್ಯಸ್ಥರಾದ ಗಣೇಶ್ ಮಲ್ಪೆ ಅವರು ಮಾಹಿತಿ ನೀಡಿದ್ದಾರೆ.
