ಉಡುಪಿ: ಉಡುಪಿಯಲ್ಲಿ ಅನ್ಯಕೋಮಿನ ಯುವಕನೊಬ್ಬ ತನ್ನ ಮಗಳನ್ನು ಅಪಹರಿಸಿ ವಿವಾಹ ನೋಂದಣಿಗೆ ಸಹಿ ಹಾಕಿಸಿದ್ದಾನೆ ಎಂದು ತಂದೆ ದೂರು ನೀಡಿದ ನಂತರ, ಈ ಪ್ರಕರಣ ಲವ್ ಜಿಹಾದ್ ಆರೋಪದೊಂದಿಗೆ ವೈರಲ್ ಆಗಿದೆ.
ಉಡುಪಿಯ ಕ್ರೈಸ್ತ ಧರ್ಮೀಯ ಗಾಡ್ವಿನ್ ದೇವದಾಸ್ ಎಂಬವರು ತಮ್ಮ ಮಗಳು ಅಪಹರಣಕ್ಕೊಳಗಾದ ಬಗ್ಗೆ ನಗರ ಪೊಲೀಸ್ ಠಾಣೆಗೆ ದೂರು ಸಲ್ಲಿಸಿದ್ದಾರೆ. ಅವರ ಪ್ರಕಾರ, ಉಡುಪಿಯ ಕರಂಬಳ್ಳಿ ನಿವಾಸಿ ಮೊಹಮ್ಮದ್ ಅಕ್ರಂ ಎಂಬಾತ ಈ ಕೃತ್ಯ ಎಸಗಿದ್ದಾನೆ. ಅವರು ಈತನ ವಿರುದ್ಧ ಹಿಂದೆಯೂ ಲೈಂಗಿಕ ಕಿರುಕುಳ ಪ್ರಕರಣ ದಾಖಲಿಸಿದ್ದನ್ನು ಉಲ್ಲೇಖಿಸಿದ್ದಾರೆ.
ಪೋಷಕರ ಪ್ರಕಾರ, ಮೊದಲು ಅಕ್ರಂ ಅವರ ಮಗಳಿಗೆ ಅಪ್ರಾಪ್ತ ವಯಸ್ಸಿನಲ್ಲಿಯೇ ಕಿರುಕುಳ ನೀಡಿದ್ದ, ಆದರೆ 5 ವರ್ಷಗಳ ಹಿಂದೆ ದಾಖಲಾದ ಪೋಕ್ಸೋ ಕೇಸು ಸಾಕ್ಷ್ಯಾಭಾವದ ಕಾರಣದಿಂದ ವಜಾಗೊಂಡಿತ್ತು. ಈಗ, ಸೇಡು ತೀರಿಸಿಕೊಳ್ಳಲು ಈ ಯುವತಿಯನ್ನು ಅಪಹರಿಸಿ, ಬೆದರಿಸಿ ವಿವಾಹಕ್ಕೆ ಒತ್ತಾಯಿಸಲಾಗಿದೆ ಎಂದು ದೂರಿದ್ದಾರೆ.
ಈ ಪ್ರಕರಣ ಇದೀಗ ಬಿಗುವಿನ ವಾತಾವರಣ ಸೃಷ್ಟಿಸಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
