ಬೆಂಗಳೂರು: ರಾಜ್ಯ ಪೊಲೀಸ್ ಇಲಾಖೆಯ ನೇಮಕಾತಿ ಪ್ರಕ್ರಿಯೆಯಲ್ಲಿ ಭಾರೀ ಬದಲಾವಣೆಯೊಂದು ಸನ್ನಿಹಿತವಾಗಿದ್ದು, ಅಗ್ನಿವೀರರಿಗೆ ವಿಶೇಷ ಆದ್ಯತೆ ನೀಡಲು ಸರ್ಕಾರ ಮುಂದಾಗಿದೆ. ಭಾರತೀಯ ಸೇನೆಯಲ್ಲಿ 4 ವರ್ಷಗಳ ಸೇವೆ ಸಲ್ಲಿಸಿ ಹೊರಬರುವ ಯುವಕರಿಗೆ ಪೊಲೀಸ್ ಪಡೆಯಲ್ಲಿ ಶೇಕಡಾ 20 ರಷ್ಟು ಮೀಸಲಾತಿ ಕಲ್ಪಿಸುವ ನಿಟ್ಟಿನಲ್ಲಿ ಗಂಭೀರ ಚಿಂತನೆಗಳು ನಡೆಯುತ್ತಿವೆ.
ಕೇಂದ್ರ ಗೃಹ ಸಚಿವಾಲಯವು ಈ ಕುರಿತು ರಾಜ್ಯ ಸರ್ಕಾರಕ್ಕೆ ಅಧಿಕೃತ ಪತ್ರ ಬರೆದಿದ್ದು, ಅಗ್ನಿವೀರರ ಅನುಭವ ಮತ್ತು ಶಿಸ್ತನ್ನು ರಾಜ್ಯದ ಭದ್ರತಾ ವಿಭಾಗಗಳಲ್ಲಿ ಬಳಸಿಕೊಳ್ಳಲು ಸೂಚಿಸಿದೆ. ಈ ಪ್ರಸ್ತಾವನೆಯನ್ನು ಆಧರಿಸಿ, ರಾಜ್ಯ ಪೊಲೀಸ್ ಇಲಾಖೆಯ ಉನ್ನತ ಅಧಿಕಾರಿಗಳ ಮಟ್ಟದಲ್ಲಿ ಈಗಾಗಲೆ ಚರ್ಚೆಗಳು ಆರಂಭವಾಗಿವೆ.
ಸಶಸ್ತ್ರ ಪೊಲೀಸ್ ಪಡೆ (Armed Police), ಜೈಲು ವಾರ್ಡನ್, ಐಆರ್ಬಿ (IRB) ಹಾಗೂ ವಿಪತ್ತು ನಿರ್ವಹಣಾ ಪಡೆಗಳಲ್ಲಿ ಅಗ್ನಿವೀರರಿಗೆ ಈ ಮೀಸಲಾತಿ ಅನ್ವಯವಾಗುವ ಸಾಧ್ಯತೆಯಿದೆ. ಸೇನಾ ತರಬೇತಿ ಪಡೆದ ಯುವಕರು ಪೊಲೀಸ್ ಇಲಾಖೆಗೆ ಸೇರುವುದರಿಂದ ಇಲಾಖೆಯ ದಕ್ಷತೆ ಹೆಚ್ಚಲಿದೆ ಎಂಬುದು ಸರ್ಕಾರದ ಆಶಯವಾಗಿದೆ.
ನೇಮಕಾತಿ ಬದಲಾವಣೆಯ ಪ್ರಮುಖ ಅಂಶಗಳು:
- ಅಗ್ನಿವೀರರಿಗೆ ಕೋಟಾ: ಪೊಲೀಸ್ ಇಲಾಖೆಯ ವಿವಿಧ ವೃಂದಗಳ ನೇಮಕಾತಿಯಲ್ಲಿ ಮಾಜಿ ಅಗ್ನಿವೀರರಿಗೆ ಕನಿಷ್ಠ ಶೇ. 20 ರಷ್ಟು ಸ್ಥಾನ ಮೀಸಲು.
- ಕೇಂದ್ರದ ನಿರ್ದೇಶನ: ಅಮಿತ್ ಶಾ ನೇತೃತ್ವದ ಕೇಂದ್ರ ಗೃಹ ಇಲಾಖೆಯಿಂದ ಎಲ್ಲಾ ರಾಜ್ಯಗಳಿಗೆ ಈ ಕುರಿತು ಮಾರ್ಚ್ 13 ರಂದು ಪತ್ರ ರವಾನೆ.
- ಇಲಾಖಾ ಪತ್ರ ವ್ಯವಹಾರ: ಡಿಐಜಿ ಯಡಾ ಮಾರ್ಟಿನ್ ಮಾರ್ಬನ್ಯಾಂಗ್ ಅವರು ಏಪ್ರಿಲ್ 17 ರಂದು ನೇಮಕಾತಿ ವಿಭಾಗಕ್ಕೆ ಕಾನೂನು ಕ್ರಮ ಕೈಗೊಳ್ಳುವಂತೆ ಸೂಚನೆ ನೀಡಿದ್ದಾರೆ.
- ಯಾವ ಹುದ್ದೆಗಳಿಗೆ ಅನ್ವಯ?: ಕಾನ್ಸ್ಟೇಬಲ್, ಫೈರ್ಮನ್, ಫಾರೆಸ್ಟ್ ಗಾರ್ಡ್ ಹಾಗೂ ಜೈಲು ವಾರ್ಡನ್ ಹುದ್ದೆಗಳಲ್ಲಿ ಆದ್ಯತೆ.
- ಆಕಾಂಕ್ಷಿಗಳ ಆತಂಕ: ಈಗಾಗಲೇ ವಿವಿಧ ಮೀಸಲಾತಿಗಳ ಅಡಿ ಶೇ. 50 ರಷ್ಟು ಹುದ್ದೆಗಳು ಭರ್ತಿಯಾಗುತ್ತಿದ್ದು, ಈಗ ಹೊಸದಾಗಿ ಶೇ. 20 ರಷ್ಟು ಸೇರ್ಪಡೆಯಾದರೆ ಸಾಮಾನ್ಯ ಅಭ್ಯರ್ಥಿಗಳಿಗೆ ಅವಕಾಶ ಕುಂಠಿತವಾಗುವ ಭೀತಿ ಎದುರಾಗಿದೆ.
ಪೊಲೀಸ್ ಉದ್ಯೋಗದ ಕನಸು ಕಾಣುತ್ತಿರುವ ರಾಜ್ಯದ ಸಾವಿರಾರು ಯುವಕರಲ್ಲಿ ಈ ಹೊಸ ನಿಯಮವು ಆತಂಕ ಮೂಡಿಸಿದೆ. ಪ್ರಸ್ತುತ ಚಾಲ್ತಿಯಲ್ಲಿರುವ ಮಹಿಳಾ ಮೀಸಲಾತಿ (ಶೇ. 25), ಮಾಜಿ ಸೈನಿಕರ ಕೋಟಾ (ಶೇ. 5) ಸೇರಿದಂತೆ ಒಟ್ಟು ಮೀಸಲಾತಿ ಪ್ರಮಾಣವು ಶೇ. 70 ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ. ಇದರಿಂದ ಸಾಮಾನ್ಯ ವರ್ಗದ ಪುರುಷ ಅಭ್ಯರ್ಥಿಗಳಿಗೆ ಉಳಿಯುವ ಅವಕಾಶಗಳು ತೀರಾ ಕಡಿಮೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಮೊದಲ ಬ್ಯಾಚ್ ಅಗ್ನಿವೀರರು 2027 ರಲ್ಲಿ ಬಿಡುಗಡೆಯಾಗಲಿದ್ದು, ಅಷ್ಟರೊಳಗೆ ನೇಮಕಾತಿ ನಿಯಮಗಳಿಗೆ ತಿದ್ದುಪಡಿ ತರುವ ಸಾಧ್ಯತೆ ದಟ್ಟವಾಗಿದೆ.
