ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಗಡಿಭಾಗದಲ್ಲಿ ಶತ್ರುರಾಷ್ಟ್ರ ಪಾಕಿಸ್ತಾನದ ಕುತಂತ್ರ ಮತ್ತೆ ಮುಂದುವರಿದಿದ್ದು, ಅಂತರಾಷ್ಟ್ರೀಯ ಗಡಿ (IB) ಹಾಗೂ ನಿಯಂತ್ರಣ ರೇಖೆಯ (LoC) ವಿವಿಧ ಭಾಗಗಳಲ್ಲಿ ಏಕಕಾಲಕ್ಕೆ ಶಂಕಿತ ಡ್ರೋನ್ಗಳು ಪತ್ತೆಯಾಗಿವೆ. ಈ ಬೆಳವಣಿಗೆಯಿಂದಾಗಿ ಗಡಿಯಲ್ಲಿ ತೀವ್ರ ಕಟ್ಟೆಚ್ಚರ ವಹಿಸಲಾಗಿದ್ದು, ಭದ್ರತಾ ಪಡೆಗಳು ಹೈ ಅಲರ್ಟ್ ಘೋಷಿಸಿವೆ.
ಭಾನುವಾರ ಸಂಜೆ ಸುಮಾರು 6:25 ರಿಂದ 7:15 ರ ಅವಧಿಯಲ್ಲಿ ರಾಜೌರಿ, ಸಾಂಬಾ ಮತ್ತು ಪೂಂಚ್ ಜಿಲ್ಲೆಗಳ ಆಯಕಟ್ಟಿನ ಜಾಗಗಳಲ್ಲಿ ಈ ಹಾರುವ ಯಂತ್ರಗಳು ಕಂಡುಬಂದಿವೆ. ರಾಜೌರಿ ಜಿಲ್ಲೆಯ ನೌಶೇರಾ ಸೆಕ್ಟರ್ನ ಗನಿಯಾ-ಕಲ್ಸಿಯಾನ್ ಗ್ರಾಮದ ಮೇಲೆ ಡ್ರೋನ್ ಸುಳಿದಾಡುತ್ತಿದ್ದಂತೆಯೇ ಎಚ್ಚೆತ್ತ ಭಾರತೀಯ ಸೇನೆಯ ಯೋಧರು ಮೆಷಿನ್ ಗನ್ ಮೂಲಕ ಗುಂಡಿನ ದಾಳಿ ನಡೆಸಿದರು. ಇದರಿಂದಾಗಿ ಶಂಕಿತ ಡ್ರೋನ್ಗಳು ಪುನಃ ಪಾಕಿಸ್ತಾನದ ಕಡೆಗೆ ಮುಖ ಮಾಡಿವೆ. ಇದೇ ವೇಳೆ ಕಲಾಕೋಟೆಯ ಖಬ್ಬರ್ ಗ್ರಾಮ, ಸಾಂಬಾದ ರಾಮಗಢ್ ಸೆಕ್ಟರ್ನ ಚಕ್ ಬಾಬ್ರಲ್ ಮತ್ತು ಪೂಂಚ್ನ ಮಂಕೋಟೆ ಭಾಗದಲ್ಲೂ ಸಂಶಯಾಸ್ಪದ ಬೆಳಕುಗಳು ಆಕಾಶದಲ್ಲಿ ಕಾಣಿಸಿಕೊಂಡಿವೆ.
ಕಳೆದ ಶುಕ್ರವಾರವಷ್ಟೇ ಸಾಂಬಾ ಜಿಲ್ಲೆಯ ಪಲೂರಾ ಎಂಬಲ್ಲಿ ಪಾಕ್ ಡ್ರೋನ್ ಮೂಲಕ ಎಸೆದಿದ್ದ ಪಿಸ್ತೂಲ್ಗಳು ಹಾಗೂ ಗ್ರೆನೇಡ್ಗಳನ್ನು ವಶಪಡಿಸಿಕೊಳ್ಳಲಾಗಿತ್ತು. ಈ ಘಟನೆಯ ಬೆನ್ನಲ್ಲೇ ಈಗ ಏಕಕಾಲಕ್ಕೆ 5 ಕ್ಕೂ ಹೆಚ್ಚು ಡ್ರೋನ್ಗಳು ಕಾಣಿಸಿಕೊಂಡಿರುವುದು ಗಡಿ ಭದ್ರತಾ ಪಡೆ (BSF) ಮತ್ತು ಪೊಲೀಸರಿಗೆ ಸವಾಲಾಗಿ ಪರಿಣಮಿಸಿದೆ. ಭಯೋತ್ಪಾದಕರಿಗೆ ಶಸ್ತ್ರಾಸ್ತ್ರ ಪೂರೈಸಲು ಅಥವಾ ಮಾದಕ ವಸ್ತುಗಳನ್ನು ಸಾಗಿಸಲು ಪಾಕಿಸ್ತಾನ ಈ ತಂತ್ರ ಹೂಡಿರಬಹುದು ಎಂದು ಶಂಕಿಸಲಾಗಿದೆ. ಸದ್ಯ ಕಾಡಿನ ಪ್ರದೇಶಗಳಲ್ಲಿ ಸೇನೆ ಮತ್ತು ಪೊಲೀಸ್ ತಂಡಗಳು ಜಂಟಿ ಶೋಧ ಕಾರ್ಯಾಚರಣೆ ನಡೆಸುತ್ತಿವೆ.
