ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಭಾಷಾ ಸಂಘರ್ಷದ ಸುದ್ದಿಗಳ ನಡುವೆಯೇ, ಜಪಾನ್ ಮೂಲದ ಯುವತಿಯೊಬ್ಬಳು ಕನ್ನಡದ ಮೇಲೆ ತೋರಿರುವ ಪ್ರೀತಿ ಈಗ ಕನ್ನಡಿಗರ ಮನ ಗೆದ್ದಿದೆ. ಜಪಾನಿ ಇನ್ಫ್ಲುಯೆನ್ಸರ್ ಮೇಯೋ ಅವರು ನಗರದಲ್ಲಿ ನಡೆದ ಸಮಾರಂಭವೊಂದರಲ್ಲಿ ಅಚ್ಚಗನ್ನಡದಲ್ಲಿ ಮಾತನಾಡಿರುವ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.
ಬೆಂಗಳೂರಿನಲ್ಲಿ ಆಯೋಜಿಸಲಾಗಿದ್ದ ‘ಒಟಾ ಟೋಕಿಯೋ’ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಮೇಯೋ, ತಮಗೆ ತಿಳಿದಿರುವ ಹಿಂದಿ ಭಾಷೆಯ ಜೊತೆಗೆ ಕನ್ನಡದಲ್ಲಿ ಸಂವಹನ ನಡೆಸಲು ಮುಂದಾದರು. ವೇದಿಕೆಯ ಮೇಲೆ ಮೈಕ್ ಹಿಡಿದು ಸಭಿಕರನ್ನುದ್ದೇಶಿಸಿ “ಚೆನ್ನಾಗಿದ್ದೀರಾ?” ಎಂದು ಕ್ಷೇಮ ವಿಚಾರಿಸಿದಾಗ ಸಭಿಕರು ಹರ್ಷೋದ್ಗಾರ ಮಾಡಿದರು. ಬಳಿಕ ನಗರದ ವಿಶೇಷ ಖಾದ್ಯದ ಬಗ್ಗೆ ವಿಚಾರಿಸಿದಾಗ ಬಂದ ಉತ್ತರ “ಮಸಾಲೆ ದೋಸೆ”. ಇದನ್ನು ಕೇಳಿ ಸಂಭ್ರಮಿಸಿದ ಅವರು, ಕನ್ನಡದಲ್ಲಿ ವಂದನೆ ಸಲ್ಲಿಸುವ ಕ್ರಮವನ್ನು ಕೇಳಿ ತಿಳಿದು “ಧನ್ಯವಾದ” ಎಂದು ಹೇಳುವ ಮೂಲಕ ಕನ್ನಡಿಗರ ಚಪ್ಪಾಳೆ ಗಿಟ್ಟಿಸಿಕೊಂಡರು. ತಮ್ಮ ಕನ್ನಡ ಇನ್ನೂ ಸುಧಾರಿಸಬೇಕಿದೆ, ಆದರೂ ಈ ಪ್ರಯತ್ನ ಬೆಂಗಳೂರಿಗರಿಗೆ ಇಷ್ಟವಾಗಿದೆ ಎಂದು ಅವರು ಇನ್ಸ್ಟಾಗ್ರಾಂನಲ್ಲಿ ಬರೆದುಕೊಂಡಿದ್ದಾರೆ.
