ಗಾಜಾಪಟ್ಟಿಯಲ್ಲಿ ಶಾಂತಿ ಸ್ಥಾಪನೆಗಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರೂಪಿಸಿರುವ ಮಹತ್ವಾಕಾಂಕ್ಷೆಯ ‘ಅಂತಾರಾಷ್ಟ್ರೀಯ ಸ್ಥಿರೀಕರಣ ಪಡೆ’ (ISF) ಯೋಜನೆಗೆ ಈಗ ಹೊಸ ವಿಘ್ನ ಎದುರಾಗಿದೆ. ಈ ಪಡೆಯಲ್ಲಿ ಪಾಕಿಸ್ತಾನದ ಸೇನೆಯನ್ನು ಸೇರಿಸಿಕೊಳ್ಳುವ ಪ್ರಸ್ತಾವನೆಗೆ ಇಸ್ರೇಲ್ ತೀವ್ರ ವಿರೋಧ ವ್ಯಕ್ತಪಡಿಸಿದ್ದು, ಇಸ್ಲಾಮಾಬಾದ್ಗೆ ನೇರ ಎಚ್ಚರಿಕೆ ನೀಡಿದೆ.
ಗಾಜಾದ ಪುನರ್ನಿರ್ಮಾಣ ಮತ್ತು ಭದ್ರತೆಯ ಉಸ್ತುವಾರಿ ವಹಿಸಲಿರುವ ಈ ಅಂತಾರಾಷ್ಟ್ರೀಯ ಪಡೆಯಲ್ಲಿ ಪಾಕ್ ಸೈನಿಕರ ಉಪಸ್ಥಿತಿಯನ್ನು ನಾವು ಯಾವುದೇ ಕಾರಣಕ್ಕೂ ಸಹಿಸುವುದಿಲ್ಲ ಎಂದು ಭಾರತದಲ್ಲಿನ ಇಸ್ರೇಲ್ ರಾಯಭಾರಿ ರೀವನ್ ಅಜರ್ ಸ್ಪಷ್ಟಪಡಿಸಿದ್ದಾರೆ. ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅವರು, ಭಯೋತ್ಪಾದನೆಯನ್ನು ಪೋಷಿಸುವ ದೇಶಗಳೊಂದಿಗೆ ಇಸ್ರೇಲ್ ಎಂದಿಗೂ ಕೈಜೋಡಿಸುವುದಿಲ್ಲ ಎಂಬ ಖಡಕ್ ಸಂದೇಶ ರವಾನಿಸಿದ್ದಾರೆ.
ಭಯೋತ್ಪಾದನಾ ನಂಟಿನ ಆತಂಕ: ಹಮಾಸ್ ಉಗ್ರಗಾಮಿ ಸಂಘಟನೆ ಮತ್ತು ಪಾಕಿಸ್ತಾನ ಮೂಲದ ಲಷ್ಕರ್-ಎ-ತೊಯ್ಬಾ (LeT) ನಡುವಿನ ಸಂಬಂಧಗಳು ದಿನೇ ದಿನೇ ವೃದ್ಧಿಸುತ್ತಿರುವುದು ಇಸ್ರೇಲ್ನ ಆತಂಕಕ್ಕೆ ಕಾರಣವಾಗಿದೆ. ಪಾಕಿಸ್ತಾನವು ಹಮಾಸ್ ಉಗ್ರರಿಗೆ ಆಶ್ರಯ ಮತ್ತು ಬೆಂಬಲ ನೀಡುತ್ತಿರುವ ಹಿನ್ನೆಲೆಯಲ್ಲಿ, ಅಂತಹ ದೇಶದ ಸೇನೆಯು ಗಾಜಾದಲ್ಲಿ ನೆಲೆ ನಿಲ್ಲುವುದು ಭದ್ರತೆಗೆ ದೊಡ್ಡ ಅಪಾಯ ಎಂದು ಅಜರ್ ವಿಶ್ಲೇಷಿಸಿದ್ದಾರೆ.
“ನಾವು ಕೇವಲ ನಂಬಿಕಸ್ಥ ಮತ್ತು ಉತ್ತಮ ರಾಜತಾಂತ್ರಿಕ ಬಾಂಧವ್ಯ ಹೊಂದಿರುವ ರಾಷ್ಟ್ರಗಳೊಂದಿಗೆ ಮಾತ್ರ ಭದ್ರತಾ ವಿಚಾರಗಳಲ್ಲಿ ಸಹಕರಿಸುತ್ತೇವೆ. ಪಾಕಿಸ್ತಾನದ ವಿಷಯದಲ್ಲಿ ಅಂತಹ ನಂಬಿಕೆ ನಮಗಿಲ್ಲ,” ಎಂದು ಹೇಳುವ ಮೂಲಕ ಪಾಕ್ ಆಡಳಿತಕ್ಕೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಇಸ್ರೇಲ್ ಮುಖಭಂಗ ಮಾಡಿದೆ. ಟ್ರಂಪ್ ಅವರ 20 ಅಂಶಗಳ ಯೋಜನೆಯಡಿ ಗಾಜಾವನ್ನು ಉಗ್ರಮುಕ್ತಗೊಳಿಸುವ ಗುರಿಯಿದ್ದು, ಅಲ್ಲಿ ಪಾಕ್ ಸೇನೆಯ ಪ್ರವೇಶವು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸಬಹುದು ಎಂಬುದು ಇಸ್ರೇಲ್ನ ವಾದವಾಗಿದೆ.
