ಟೆಹ್ರಾನ್/ವಾಷಿಂಗ್ಟನ್ : ಇಸ್ರೇಲ್ ಹಾಗೂ ಇರಾನ್ ನಡುವಿನ ಯುದ್ಧದ ಅಲೆ ದಿನದಿಂದ ದಿನಕ್ಕೆ ತೀವ್ರಗೊಳ್ಳುತ್ತಿದ್ದು, ಈ ಸಂಘರ್ಷಕ್ಕೆ ಈಗ ಅಮೆರಿಕದ ನೇರ ಎಚ್ಚರಿಕೆಗೂ ಇರಾನ್ ತೀವ್ರ ಪ್ರತಿಕ್ರಿಯೆ ನೀಡಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ “ಇರಾನ್ ಶರಣಾಗಬೇಕು” ಎಂಬ ಹೇಳಿಕೆಗೆ ಪ್ರತಿಸ್ಪಂದಿಸಿದ ಇರಾನ್‌ನ ಉನ್ನತ ನಾಯಕ ಆಯತೊಲ್ಲಾ ಅಲಿ ಖಮೇನಿ, “ಇರಾನ್ ಶರಣಾಗುವ ರಾಷ್ಟ್ರವಲ್ಲ. ಒಂದು ವೇಳೆ ಅಮೆರಿಕ ಮಧ್ಯಪ್ರವೇಶ ಮಾಡಿದರೆ ಮುಂದೆಂದೂ ಸರಿಪಡಿಸಲಾಗದ ಮಟ್ಟದ ಹಾನಿಯನ್ನು ಎದುರಿಸಬೇಕಾಗುತ್ತದೆ ” ಎಂದು ಹೇಳಿದ್ದಾರೆ.
ಇದರ ಬೆನ್ನಲ್ಲೇ , ಇರಾನ್ ಇಸ್ರೇಲ್ ಮೇಲಿನ ದಾಳಿಯ ಹಿನ್ನಲೆಯಲ್ಲಿ ತನ್ನ ಶಕ್ತಿಶಾಲಿ ಫತಾಹ್-1 ಹೈಪರ್‌ಸಾನಿಕ್ ಕ್ಷಿಪಣಿಯನ್ನು ಉಡಾಯಿಸಿದ್ದು, ಈ ಕ್ಷಿಪಣಿ ಇಸ್ರೇಲ್‌ನ ಐರನ್ ಡೋಮ್‌ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಭೇದಿಸಿದೆ. ಕ್ಷಿಪಣಿ ಟೆಲ್ ಅವಿವ್ ಸಮೀಪ ಬಿದ್ದು ಸ್ಫೋಟಗೊಂಡಿದ್ದು, ಇಸ್ರೇಲ್ ಮಾಧ್ಯಮಗಳು ಈ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಿಲ್ಲ.
585 ಮಂದಿ ಮೃತರು – 1,300 ಮಂದಿ ಗಾಯಗೊಂಡವರು
ಇಸ್ರೇಲ್ ಕೈಗೊಂಡಿರುವ ವಾಯು ದಾಳಿಗಳಿಂದ ಇರಾನ್‌ನಲ್ಲಿ ಈಗಾಗಲೇ ಕನಿಷ್ಠ 585 ಮಂದಿ ಸಾವನ್ನಪ್ಪಿದ್ದು, 1,300ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ. ಇನ್ನು ಇರಾನ್ ತಿರುಗೇಟಾಗಿ ನಡೆಸಿದ 400ಕ್ಕೂ ಹೆಚ್ಚು ಕ್ಷಿಪಣಿ ದಾಳಿ ಮತ್ತು ಡ್ರೋನ್ ದಾಳಗಳಿಂದ ಇಸ್ರೇಲ್‌ನಲ್ಲಿ 24 ಮಂದಿ ಸಾವಿಗೀಡಾಗಿದ್ದಾರೆ.
ಅಮೆರಿಕದ ಸಭೆ, ಟ್ರಂಪ್ ವ್ಯಾಖ್ಯಾನಗಳು ಕುತೂಹಲಕ್ಕೆ ಕಾರಣ
ವಾಷಿಂಗ್ಟನ್‌ನಲ್ಲಿ ಟ್ರಂಪ್ ತಮ್ಮ ಭದ್ರತಾ ಅಧಿಕಾರಿಗಳೊಂದಿಗೆ ಶ್ವೇತಭವನದಲ್ಲಿ ವಿಶೇಷ ಸಭೆ ನಡೆಸಿದ್ದಾರೆ. ಈ ಸಭೆಗೂ ಮೊದಲು “ಅಲಿ ಖಮೇನಿ ಎಲ್ಲಿ ಅಡಗಿದ್ದಾರೆ ಎಂಬುದು ನಮಗೆ ಗೊತ್ತು. ಆದರೆ ಈಗಲೇ ನಾವು ಅವರನ್ನು ಕೊಲ್ಲುವುದಿಲ್ಲ,” ಎಂದು ಅವರು ಸಾಮಾಜಿಕ ಮಾಧ್ಯಮದಲ್ಲಿ ತಿಳಿಸಿದ್ದು, ಇದರ ಬೆನ್ನಲ್ಲೇ ಸಭೆ ನಡೆಸಿ ಚರ್ಚೆ ನಡೆಸಿರುವುದು ಕುತೂಹಲಕ್ಕೆ ಕಾರಣವಾಗಿದೆ.
ಇರಾನ್ ಪರಮಾಣು ಶಸ್ತ್ರಾಸ್ತ್ರ ಅಭಿವೃದ್ಧಿ ಮುಂದುವರಿಕೆ
ಇರಾನ್ ವಿದೇಶಾಂಗ ಸಚಿವಾಲಯದ ವಕ್ತಾರ ಇಸ್ಮಾಯಿಲ್ ಬಗಾಯಿ ಮತ್ತು ಇತರ ಅಧಿಕಾರಿಗಳೂ ಅಮೆರಿಕದ ಮಧ್ಯಸ್ಥಿಕೆಯನ್ನು ತಳ್ಳಿಹಾಕಿದ್ದಾರೆ. ಪರಮಾಣು ಯೋಜನೆ ಮುಂದುವರಿಯಲಿದೆ ಎಂದು ಸ್ಪಷ್ಟ ಸಂದೇಶ ನೀಡಿದ್ದಾರೆ.
ಪ್ರಮುಖ ಉಲ್ಲೇಖಗಳು:
“ಇರಾನ್ ಶರಣಾಗುವ ರಾಷ್ಟ್ರವಲ್ಲ! ಇರಾನ್ ಯುದ್ಧದಲ್ಲಿ ಅಮೆರಿಕ ಹಸ್ತಕ್ಷೇಪ ಮಾಡಿದರೆ, , ಎಂದಿಗೂ ಸರಿಪಡಿಸಲಾಗದ ಹಾನಿಯನ್ನು ಎದುರಿಸಬೇಕಾಗುತ್ತದೆ.”
— ಅಲಿ ಖಮೇನಿ, ಇರಾನ್ ಸರ್ವೋಚ್ಚ ನಾಯಕ
“ನಾನು ಇರಾನ್ ಮೇಲೆ ದಾಳಿ ಮಾಡಬಹುದು, ಮಾಡದೆಯೂ ಇರಬಹುದು. ನಾನೇನು ಮಾಡುವೆ ಎಂಬುದು ಯಾರಿಗೂ ಗೊತ್ತಾಗುವುದಿಲ್ಲ.”
— ಡೊನಾಲ್ಡ್ ಟ್ರಂಪ್, ಅಮೆರಿಕ ಅಧ್ಯಕ್ಷ
