ಇಂದೋರ್: ಮಧ್ಯಪ್ರದೇಶದ ಇಂದೋರ್ ನಗರದಲ್ಲಿ ಅತ್ಯಂತ ನಾಗರಿಕ ಸಮಾಜವೇ ತಲೆತಗ್ಗಿಸುವಂತಹ ಭೀಕರ ಘಟನೆಯೊಂದು ಬೆಳಕಿಗೆ ಬಂದಿದೆ. ನಾಪತ್ತೆಯಾಗಿದ್ದ 24 ವರ್ಷದ ಎಂಬಿಎ ವಿದ್ಯಾರ್ಥಿನಿಯೊಬ್ಬಳು ತನ್ನದೇ ಸಹಪಾಠಿಯ ಬಾಡಿಗೆ ಮನೆಯಲ್ಲಿ ನಗ್ನ ಹಾಗೂ ಕೊಳೆತ ಸ್ಥಿತಿಯಲ್ಲಿ ಶವವಾಗಿ ಪತ್ತೆಯಾಗಿದ್ದಾಳೆ.
ಘಟನೆಯ ವಿವರ:
ಇಂದೋರ್ನ ಸನ್ವರ್ ರಸ್ತೆಯಲ್ಲಿರುವ ಕಾಲೇಜೊಂದರಲ್ಲಿ ಪ್ರಥಮ ವರ್ಷದ ಎಂಬಿಎ ವ್ಯಾಸಂಗ ಮಾಡುತ್ತಿದ್ದ ಯುವತಿ ಕಳೆದ ಮಂಗಳವಾರದಿಂದ ನಾಪತ್ತೆಯಾಗಿದ್ದಳು. ಅಂದು ಮಧ್ಯಾಹ್ನ ಜನನ ಪ್ರಮಾಣಪತ್ರದ ಕೆಲಸಕ್ಕೆಂದು ತಂದೆಯೊಂದಿಗೆ ನಗರಕ್ಕೆ ಬಂದಿದ್ದ ಆಕೆ, ಸಂಜೆ ಗೆಳೆಯ ಪಿಯೂಷ್ ಧನೋಟಿಯಾ ಎಂಬಾತನ ಜನ್ಮದಿನದ ಪಾರ್ಟಿಗೆ ಹೋಗುವುದಾಗಿ ಮನೆಯವರಿಗೆ ತಿಳಿಸಿದ್ದಳು. ರಾತ್ರಿ 11 ಗಂಟೆಗೆ ವಾಪಸ್ ಬರುವುದಾಗಿ ಭರವಸೆ ನೀಡಿದ್ದ ಮಗಳು ಮನೆಗೆ ಮರಳದಿದ್ದಾಗ ಪೋಷಕರು ಆತಂಕಗೊಂಡಿದ್ದರು.
ವಾಟ್ಸಾಪ್ನಲ್ಲಿ ಹರಿದಾಡಿದ ವಿಡಿಯೋ:
ಇತ್ತ ಯುವತಿ ನಾಪತ್ತೆಯಾದ ರಾತ್ರಿಯೇ ಕಾಲೇಜಿನ ಅಧಿಕೃತ ವಾಟ್ಸಾಪ್ ಗ್ರೂಪ್ಗೆ ಆಕೆಯ ಫೋನ್ನಿಂದಲೇ ಅಶ್ಲೀಲ ವಿಡಿಯೋವೊಂದು ಪೋಸ್ಟ್ ಆಗಿತ್ತು. ಆ ವಿಡಿಯೋದಲ್ಲಿ ಯುವತಿಯ ಮುಖ ಸ್ಪಷ್ಟವಾಗಿ ಕಾಣಿಸುತ್ತಿದ್ದರೆ, ಜೊತೆಗಿದ್ದ ಯುವಕನ ಮುಖವನ್ನು ಎಮೋಜಿಯಿಂದ ಮರೆಮಾಚಲಾಗಿತ್ತು. ಈ ವಿಷಯ ತಿಳಿದ ಕಾಲೇಜು ಆಡಳಿತ ಮಂಡಳಿ ತಕ್ಷಣ ವಿಡಿಯೋ ಡಿಲೀಟ್ ಮಾಡಿ, ಬುಧವಾರ ಯುವತಿಯ ತಂದೆಗೆ ಮಾಹಿತಿ ನೀಡಿತು.
ಸತ್ತ ಮಗಳನ್ನು ಗುರುತಿಸಿದ ತಂದೆ:
ದ್ವಾರಿಕಾಪುರಿ ವ್ಯಾಪ್ತಿಯ ಅಂಕಲ್ ಗಲಿಯಲ್ಲಿರುವ ಪಿಯೂಷ್ನ ಬಾಡಿಗೆ ಮನೆಯಿಂದ ಅಸಹನೀಯ ವಾಸನೆ ಬರುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಪೊಲೀಸರಿಗೆ ದೂರು ನೀಡಿದ್ದರು. ಪೊಲೀಸರು ಸ್ಥಳಕ್ಕೆ ಬಂದು ಹೊರಗಿನಿಂದ ಹಾಕಿದ್ದ ಬೀಗವನ್ನು ಒಡೆದು ನೋಡಿದಾಗ, ಯುವತಿಯ ದೇಹ ಸಂಪೂರ್ಣವಾಗಿ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಶವವು ಗುರುತಿಸಲಾಗದಷ್ಟು ವಿರೂಪಗೊಂಡಿದ್ದರಿಂದ, ಆಕೆಯ ಕಾಲಿನಲ್ಲಿದ್ದ ಸಾಕ್ಸ್ ನೋಡಿ ತಂದೆ ಮಗಳನ್ನು ಗುರುತಿಸಿದ್ದಾರೆ.
ಆರೋಪಿಗಾಗಿ ತೀವ್ರ ಹುಡುಕಾಟ:
ಘಟನೆಯ ನಂತರ ಪ್ರಮುಖ ಆರೋಪಿ ಪಿಯೂಷ್ ಧನೋಟಿಯಾ ಫೋನ್ ಸ್ವಿಚ್ ಆಫ್ ಮಾಡಿಕೊಂಡು ತಲೆಮರೆಸಿಕೊಂಡಿದ್ದಾನೆ. ಪೊಲೀಸರು ಆತನ ಪತ್ತೆಗಾಗಿ ವಿಶೇಷ ತಂಡಗಳನ್ನು ರಚಿಸಿದ್ದು, ಮರಣೋತ್ತರ ಪರೀಕ್ಷೆಯ ವರದಿಗಾಗಿ ಕಾಯುತ್ತಿದ್ದಾರೆ. ಪೊಲೀಸರ ವಿಳಂಬ ಧೋರಣೆಯೇ ಈ ದುರಂತಕ್ಕೆ ಕಾರಣ ಎಂದು ಸಂತ್ರಸ್ತೆಯ ಕುಟುಂಬಸ್ಥರು ಗಂಭೀರವಾಗಿ ಆರೋಪಿಸಿದ್ದಾರೆ.
