ನವದೆಹಲಿ: ಭಾರತ ಮತ್ತು ಪಾಕಿಸ್ತಾನ ನಡುವಿನ ಗಡಿ ಉದ್ವಿಗ್ನತೆ ಹೆಚ್ಚುತ್ತಿರುವಂತೆಯೇ, ಪಾಕಿಸ್ತಾನದ ಮನವಿಗೆ ಸ್ಪಂದನೆ ನೀಡಿದ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಇಂದು ಒಂದು ಗೌಪ್ಯ ಸಭೆ ನಡೆಸಲು ಮುಂದಾಗಿದೆ.
ಪ್ರಸ್ತುತ 15 ಸದಸ್ಯ ದೇಶಗಳ ಭದ್ರತಾ ಮಂಡಳಿಯಲ್ಲಿ ಪಾಕಿಸ್ತಾನವು ಶಾಶ್ವತವಲ್ಲದ ಸದಸ್ಯರಲ್ಲೊಂದು ಆಗಿದ್ದು, ಗಡಿಭಾಗದ ಪರಿಸ್ಥಿತಿ ತೀವ್ರವಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಸಭೆ ಕರೆಯಲಾಗಿದೆ. ಭದ್ರತಾ ಮಂಡಳಿಯ ಮೇ ತಿಂಗಳ ಅಧ್ಯಕ್ಷ ಎವಂಗಿಲೋಸ್ ಸೆಕೆರಿಸ್ ಮಾತನಾಡುತ್ತಾ, “ಪಾಕಿಸ್ತಾನದಿಂದ ಮನವಿ ಬಂದಿದ್ದು, ಪರಿಸ್ಥಿತಿಯ ಕುರಿತು ಚರ್ಚಿಸಲು ನಾವು ಇಂದು ಗೌಪ್ಯ ಸಭೆ ನಡೆಸುತ್ತಿದ್ದೇವೆ” ಎಂದು ತಿಳಿಸಿದ್ದಾರೆ.
ಪಹಲ್ಗಾಮ್‌ನಲ್ಲಿ ನಡೆದ ಭಯಾನಕ ಉಗ್ರ ದಾಳಿಯ ಕುರಿತಾದ ಚರ್ಚೆಯು ಕೂಡ ಸಭೆಯಲ್ಲಿ ಪ್ರಮುಖ ವಿಷಯವಾಗಿದ್ದು, “ಅಂತಹ ಘೋರ ದಾಳಿಗಳನ್ನು ನಾವು ಬಲವಾಗಿ ಖಂಡಿಸುತ್ತೇವೆ,” ಎಂದಿದ್ದಾರೆ. ಈ ಬೆಳವಣಿಗೆಯು ಭಾರತ-ಪಾಕ ಉದ್ವಿಗ್ನತೆಯ ಕುರಿತ ಭಿನ್ನಮತಗಳಿಗೆ ಗಂಭೀರತೆಯ ಸೂಚನೆಯಾಗಿದ್ದು, ಮುಂದಿನ ರಾಜತಾಂತ್ರಿಕ ತಿರುವಿಗೆ ದಾರಿ ತೆರೆದಿದೆ.
