ಭೋಪಾಲ್: ಭಾರತೀಯ ಸೇನೆಯ ಹಿರಿಯ ಅಧಿಕಾರಿ ಕರ್ನಲ್ ಸೋಫಿಯಾ ಖುರೇಷಿ ಅವರ ವಿರುದ್ಧ ಅವಹೇಳನಕಾರಿ ಹೇಳಿಕೆ ನೀಡಿದ್ದ ಹಿನ್ನೆಲೆಯಲ್ಲಿ, ಮಧ್ಯಪ್ರದೇಶದ ರಾಜ್ಯ ಸಚಿವ ಹಾಗೂ ಬಿಜೆಪಿ ನಾಯಕ ಕುನ್ವರ್ ವಿಜಯ್ ಶಾ ಅವರ ವಿರುದ್ಧ ಎಫ್‌ಐಆರ್ ದಾಖಲಿಸಲು ಮಧ್ಯಪ್ರದೇಶ ಹೈಕೋರ್ಟ್ ಡಿಜಿಪಿಗೆ ತುರ್ತು ಸೂಚನೆ ನೀಡಿದೆ.
ವಿಧಾನಸಭಾ ಸದಸ್ಯನೂ ಆಗಿರುವ ವಿಜಯ್ ಶಾ, ಕರ್ನಲ್ ಖುರೇಷಿಯನ್ನು “ಭಯೋತ್ಪಾದಕರ ಸಹೋದರಿ” ಎಂದು ಕರೆದಿದ್ದರು. ಈ ಹೇಳಿಕೆಯನ್ನು ನ್ಯಾಯಾಲಯವು ಗಂಭೀರವಾಗಿ ಪರಿಗಣಿಸಿದ್ದು, ಇದು ದೇಶದ ಸಾರ್ವಭೌಮತೆ, ಏಕತೆ ಮತ್ತು ಧಾರ್ಮಿಕ ಸಹಿಷ್ಣುತೆಗೆ ಧಕ್ಕೆಯಾಗಿದೆ ಎಂದುDivision Bench ಅಭಿಪ್ರಾಯಪಟ್ಟಿದೆ.
ನ್ಯಾಯಮೂರ್ತಿ ಅತುಲ್ ಶ್ರೀಧರನ್ ಮತ್ತು ನ್ಯಾಯಮೂರ್ತಿ ಅನುರಾಧಾ ಶುಕ್ಲಾ ಅವರನ್ನೊಳಗೊಂಡ ಪೀಠ, ಭಾರತೀಯ ನ್ಯಾಯ ಸಂಹಿತೆ (Bharatiya Nyaya Sanhita – BNS), 2023 ಅಡಿಯಲ್ಲಿ ಈ ಹೇಳಿಕೆಗಳು ಪ್ರಾಥಮಿಕವಾಗಿ ಸೆಕ್ಷನ್ 152 (ರಾಷ್ಟ್ರದ ಏಕತೆಗೆ ಅಪಾಯ ಕಲ್ಪಿಸುವ ಹೇಳಿಕೆಗಳು) ಮತ್ತು ಸೆಕ್ಷನ್ 192 (ಧರ್ಮ, ಜಾತಿ ಅಥವಾ ಭಾಷೆ ಆಧಾರದ ಮೇಲೆ ದ್ವೇಷ ಹುಟ್ಟುಹಾಕುವ ಹೇಳಿಕೆ) ಗಳ ಉಲ್ಲಂಘನೆಯಾಗಿದೆ ಎಂದು ತೀರ್ಮಾನಿಸಿದೆ.
ಪೀಠದ ಆದೇಶದಂತೆ, ಇಂದು ಸಂಜೆಯೊಳಗೆ ಎಫ್‌ಐಆರ್ ದಾಖಲಿಸಬೇಕು ಎಂದು ರಾಜ್ಯ ಪೊಲೀಸ್ ಮಹಾನಿರ್ದೇಶಕ (DGP) ಗೆ ಸೂಚಿಸಲಾಗಿದೆ. ಅದಲ್ಲದೆ, ಆದೇಶ ಪಾಲನೆಯಲ್ಲಿನ ವಿಳಂಬ ಅಥವಾ ನಿರ್ಲಕ್ಷ್ಯವಿದ್ದರೆ, ನ್ಯಾಯಾಲಯ ನಿಂದನೆ ಕಾಯ್ದೆ (Contempt of Court) ಅಡಿಯಲ್ಲಿ ಡಿಜಿಪಿಯವರ ಮೇಲೆ ಕ್ರಮ ಜರುಗಿಸಲಾಗುವುದು ಎಂದು ಹೈಕೋರ್ಟ್ ಎಚ್ಚರಿಸಿದೆ.
ಕರ್ನಲ್ ಖುರೇಷಿ ಅವರು ಭಾರತೀಯ ಸೇನೆಯ ಮಹಿಳಾ ಅಧಿಕಾರಿಗಳಲ್ಲೊಬ್ಬರಾಗಿದ್ದು, ತಮ್ಮ ಸೇವೆಯ ಕಾಲದಲ್ಲಿ ಹಲವಾರು ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಿಷನ್‌ಗಳಲ್ಲಿ ಪಾಲ್ಗೊಂಡಿದ್ದಾರೆ. ಇಸ್ಲಾಂ ಧರ್ಮದವರು ಎಂಬ ಕಾರಣದಿಂದ ಅವರನ್ನು ಉದ್ದೇಶಿತವಾಗಿ ಟೀಕಿಸಿರುವುದು ಪ್ರಾಥಮಿಕವಾಗಿ ದ್ವೇಷಭರಿತ ಹೇಳಿಕೆಯಾಗಿದೆಯೆಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
