ಹಾಸನ (ಬೇಲೂರು): ಪ್ರೀತಿಗೊಂದು ಭಾಷೆ, ಗಡಿಯ ಬಂಧನವಿಲ್ಲ ಎಂಬುದನ್ನು ಸಾಬೀತುಪಡಿಸುತ್ತಾ, ಇಂಗ್ಲೆಂಡ್ ದೇಶದ ಯುವಕನೊಬ್ಬ ಬೇಲೂರು ಮೂಲದ ಯುವತಿಯೊಂದಿಗೆ ಶಾಸ್ತ್ರೋಕ್ತವಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಅಪರೂಪದ ಘಟನೆ ಹಾಸನ ಜಿಲ್ಲೆಯ ಐತಿಹಾಸಿಕ ಪಟ್ಟಣವಾದ ಬೇಲೂರಿನಲ್ಲಿ ನಡೆದಿದೆ.
ವಿದೇಶದಲ್ಲಿ ಅರಳಿದ ಪ್ರೇಮ ಕಥೆ: ಬೇಲೂರು ತಾಲ್ಲೂಕಿನ ಹೇಮಶ್ರೀ ಅವರು ಉದ್ಯೋಗ ನಿಮಿತ್ತ ಇಂಗ್ಲೆಂಡ್ನಲ್ಲಿ ನೆಲೆಸಿದ್ದರು. ಅಲ್ಲಿನ ಒಂದು ಪ್ರತಿಷ್ಠಿತ ಕಂಪನಿಯಲ್ಲಿ ಅವರು ಕಾರ್ಯನಿರ್ವಹಿಸುತ್ತಿದ್ದ ಸಂದರ್ಭದಲ್ಲಿ, ಅದೇ ಕಂಪನಿಯ ಸಹೋದ್ಯೋಗಿ ಹಾಗೂ ಇಂಗ್ಲೆಂಡ್ ದೇಶದ ಪ್ರಜೆ ಜಾಯ್ ಅವರ ಪರಿಚಯವಾಯಿತು. ಈ ಸ್ನೇಹವು ಕಾಲಾನಂತರದಲ್ಲಿ ಅನ್ಯೋನ್ಯ ಪ್ರೀತಿಯಾಗಿ ಪರಿವರ್ತನೆಯಾಯಿತು.
ಪೋಷಕರ ಪೂರ್ಣ ಸಮ್ಮತಿ: ತಮ್ಮ ಪ್ರೀತಿಯ ಕುರಿತು ಹೇಮಶ್ರೀ ಮತ್ತು ಜಾಯ್ ಇಬ್ಬರೂ ತಮ್ಮ ಕುಟುಂಬದ ಸದಸ್ಯರಿಗೆ ಮನವರಿಕೆ ಮಾಡಿಕೊಟ್ಟರು. ಈ ಅನನ್ಯ ಪ್ರೀತಿಗೆ ಇಬ್ಬರ ಮನೆಯವರೂ ಪೂರ್ಣ ಮನಸ್ಸಿನಿಂದ ಸಮ್ಮತಿ ಸೂಚಿಸಿದರು. ದೇಶ, ಸಂಸ್ಕೃತಿ ಭಿನ್ನವಾಗಿದ್ದರೂ, ಪ್ರೀತಿಯೆಂಬ ಭಾವಕ್ಕೆ ಬೆಲೆ ಕೊಟ್ಟು, ಎರಡೂ ಕುಟುಂಬಗಳು ಸಾರಾತ್ಮಕವಾಗಿ ಪ್ರತಿಕ್ರಿಯಿಸಿ ಈ ವಿವಾಹಕ್ಕೆ ನೆರವಾದವು.
ಬೇಲೂರಿನಲ್ಲಿ ಹಿಂದೂ ಸಂಪ್ರದಾಯದಂತೆ ವಿವಾಹ: ಪೋಷಕರ ಮತ್ತು ಹಿರಿಯರ ಆಶೀರ್ವಾದದೊಂದಿಗೆ, ಭಾನುವಾರದಂದು ಬೇಲೂರು ತಾಲೂಕಿನಲ್ಲಿ ಹಿಂದೂ ಧಾರ್ಮಿಕ ಸಂಪ್ರದಾಯಗಳ ಪ್ರಕಾರ ವಿವಾಹ ಮಹೋತ್ಸವವು ನೆರವೇರಿತು. ನವ ವರ ಜಾಯ್ ಮತ್ತು ವಧು ಹೇಮಶ್ರೀ ಅವರು ಸಪ್ತಪದಿ ತುಳಿದು ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಈ ಸಮಯದಲ್ಲಿ ಸಂಬಂಧಿಕರು, ಸ್ನೇಹಿತರು ಮತ್ತು ಸ್ಥಳೀಯರು ಸಾಕ್ಷಿಯಾಗಿ, ನವ ದಂಪತಿಗೆ ಶುಭ ಕೋರಿದರು. ಈ ಮೂಲಕ ಅಂತರರಾಷ್ಟ್ರೀಯ ಪ್ರೀತಿಯೊಂದು ಭಾರತೀಯ ಸಂಪ್ರದಾಯದೊಂದಿಗೆ ಮೇಳೈಸಿದ ಸುಂದರ ಮದುವೆಗೆ ಬೇಲೂರು ಸಾಕ್ಷಿಯಾಯಿತು.
