ಉಡುಪಿ : ಭಾರೀ ಮಳೆಯಿಂದ ಮಧ್ವ ಸರೋವರ ಜಲಕಮಲವಾಗಿ ಪರಿವರ್ತಿತವಾದ ಹಿನ್ನೆಲೆಯಲ್ಲಿ, ಶ್ರೀ ಕೃಷ್ಣ ಹಾಗೂ ಶ್ರೀ ಮುಖ್ಯಪ್ರಾಣ ದೇವರಿಗೆ ಅದ್ದೂರಿಯಾದ ಸಪ್ತೋತ್ಸವಾಂಗ ತೆಪ್ಪೋತ್ಸವ ಮಂಗಳವಾಗಿ ನೆರವೇರಿತು. ಭಕ್ತರು ಸಾಕ್ಷಿಯಾದ ಈ ಅಪೂರ್ವ ದೃಶ್ಯ ಭಕ್ತಿಭಾವದಿಂದ ತುಂಬಿತ್ತು.
ಶ್ರೀ ಕೃಷ್ಣ ಮಠದಲ್ಲಿ ವಿಶೇಷ ಅಲಂಕಾರವನ್ನು ಪರ್ಯಾಯ ಪುತ್ತಿಗೆ ಮಠದ ಕಿರಿಯ ಶ್ರೀಪಾದರು ನೆರವೇರಿಸಿ ಬಳಿಕ ಪೂಜಾ ವಿಧಿಗಳನ್ನು ಶ್ರದ್ಧಾಪೂರ್ವಕವಾಗಿ ನೆರವೇರಿಸಿದರು.
ಹಿರಿಯ ಶ್ರೀಪಾದರು ವಿಷ್ಣುಸಹಸ್ರನಾಮಾವಳಿಯ ಸಹಿತ ಶ್ರೀ ಕೃಷ್ಣನಿಗೆ ಅರ್ಚನೆ ಮಾಡಿ, ಮಹಾಪೂಜೆಯನ್ನು ನೆರವೇರಿಸಿದರು. ಶ್ರೀ ಮುಖ್ಯಪ್ರಾಣ ಹಾಗೂ ಗರುಡ ದೇವರಿಗೆ ಕೂಡಾ ಪೂಜಾ ವಿಧಿಗಳು ನಡೆಯಿತು. ತೆಪ್ಪೋತ್ಸವದ ವೇಳೆಯಲ್ಲಿ ಗೀತಾರತಿಯ ದೀಪ ಬೆಳಗಲ್ಪಟ್ಟಾಗ ಮಧ್ವ ಸರೋವರದ ಒಳಗೆ ಭಕ್ತಿಭಾವದ ಹೊಳೆ ಹರಿದುಹೋಯಿತು.
