ನವದೆಹಲಿ: ದೀಪಾವಳಿ ಹಬ್ಬ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ವಾಯು ಮಾಲಿನ್ಯವು ಅಪಾಯಕಾರಿ ಮಟ್ಟವನ್ನು ತಲುಪಿದೆ.
ಚಳಿಗಾಲ ಪ್ರಾರಂಭವಾಗುತ್ತಿದ್ದಂತೆ ರಾಷ್ಟ್ರ ರಾಜಧಾನಿ ದೆಹಲಿಯ ಹಲವು ಪ್ರದೇಶಗಳಲ್ಲಿ ವಾಯು ಗುಣಮಟ್ಟ ಸೂಚ್ಯಂಕ (AQI) ಸತತ ಆರನೇ ದಿನವೂ ‘ಕಳಪೆ’ ಮತ್ತು ‘ತೀರಾ ಕಳಪೆ’ ವರ್ಗಗಳಲ್ಲಿ ದಾಖಲಾಗಿದೆ. ದೀಪಾವಳಿಗೂ ಒಂದು ದಿನ ಮುಂಚಿತವಾಗಿ ಗಾಳಿಯ ಗುಣಮಟ್ಟ ಮತ್ತಷ್ಟು ಕುಸಿದಿದೆ.
ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿಯ (CPCB) ಅಂಕಿಅಂಶಗಳ ಪ್ರಕಾರ, ಅಕ್ಷರಧಾಮ ಪ್ರದೇಶವು 426 AQI ದಾಖಲಿಸಿದ್ದು, ಇದನ್ನು ‘ಗಂಭೀರ’ (Severe) ವರ್ಗಕ್ಕೆ ಸೇರಿಸಲಾಗಿದೆ. ಇದು ಈ ಋತುವಿನಲ್ಲಿ ನಗರದಲ್ಲಿ ದಾಖಲಾದ ಅತಿ ಹೆಚ್ಚು ಮಾಲಿನ್ಯದ ಮಟ್ಟಗಳಲ್ಲಿ ಒಂದಾಗಿದೆ.
ಅಕ್ಷರಧಾಮದ ನಂತರ, ಆನಂದ್ ವಿಹಾರ್ ಪ್ರದೇಶವು 418 ರ ವಾಯು ಗುಣಮಟ್ಟ ಸೂಚ್ಯಂಕದೊಂದಿಗೆ ಎರಡನೇ ಸ್ಥಾನದಲ್ಲಿದೆ. ರವಿವಾರ ಬೆಳಗ್ಗೆ ಬರಾಪುಲ್ಲಾ ಪ್ರದೇಶದಲ್ಲಿ 290 ರ ವಾಯು ಗುಣಮಟ್ಟ ಸೂಚ್ಯಂಕ ದಾಖಲಾಗಿದ್ದು, ಇದು ‘ಕಳಪೆ’ ವರ್ಗಕ್ಕೆ ಸೇರಿದೆ.
ರಾಷ್ಟ್ರೀಯ ರಾಜಧಾನಿ ಪ್ರದೇಶ (NCR) ದಲ್ಲೂ ಗಾಳಿಯ ಗುಣಮಟ್ಟ ಹದಗೆಟ್ಟಿದ್ದು, ಗಾಜಿಯಾಬಾದ್ನಲ್ಲಿ 324 ರ ‘ತೀರಾ ಕಳಪೆ’ AQI ದಾಖಲಾಗಿದೆ. ನೋಯ್ಡಾ (298) ಮತ್ತು ಗುರುಗ್ರಾಮ್ (258) ಸಹ ‘ಕಳಪೆ’ ಮಟ್ಟದಲ್ಲಿವೆ.
ಪಟಾಕಿ ಸಿಡಿಸಲು ಅನುಮತಿ:
ಸುಪ್ರೀಂ ಕೋರ್ಟ್ ಹಸಿರು ಪಟಾಕಿಗಳ ಮಾರಾಟಕ್ಕೆ ಅಕ್ಟೋಬರ್ 18 ರಿಂದ 20 ರವರೆಗೆ ಮೂರು ದಿನಗಳ ಕಾಲ ಅನುಮತಿ ನೀಡಿದೆ. ಅಲ್ಲದೆ, ಅಕ್ಟೋಬರ್ 19 ಮತ್ತು 20 ರಂದು ಬೆಳಗ್ಗೆ 6 ರಿಂದ ಬೆಳಗ್ಗೆ 7 ರವರೆಗೆ ಮತ್ತು ರಾತ್ರಿ 8 ರಿಂದ ರಾತ್ರಿ 10 ರವರೆಗೆ ಮಾತ್ರ ಪಟಾಕಿಗಳನ್ನು ಸಿಡಿಸಲು ಅವಕಾಶ ನೀಡಲಾಗಿದೆ.
ಈ ನಿಯಮಗಳ ನಡುವೆಯೂ, ಮಾಲಿನ್ಯದ ಮಟ್ಟ ಗಣನೀಯವಾಗಿ ಏರುತ್ತಿರುವುದು ದೆಹಲಿಯ ನಾಗರಿಕರಲ್ಲಿ ಆತಂಕ ಮೂಡಿಸಿದೆ. ಸರ್ಕಾರ ಮತ್ತು ನಾಗರಿಕರು ಪರಿಸರ ಸ್ನೇಹಿ ದೀಪಾವಳಿ ಆಚರಣೆಗೆ ಒತ್ತು ನೀಡುವ ಅವಶ್ಯಕತೆಯಿದೆ.
