ರಾಜಧಾನಿ ಬೆಂಗಳೂರಿನ ಡೈರಿ ಸರ್ಕಲ್ ಫ್ಲೈಓವರ್ ಮೇಲೆ ನಡೆದ ಭೀಕರ ₹7.11 ಕೋಟಿ ನಗದು ಸುಲಿಗೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆಯನ್ನು ತೀವ್ರಗೊಳಿಸಿರುವ ಪೊಲೀಸರು, ದರೋಡೆಕೋರರ ಜಾಡು ಹಿಡಿದು ಹೊರಟಾಗ ಪ್ರಮುಖ ಸುಳಿವು ದೊರೆತಿದೆ. ದರೋಡೆ ಮಾಡಿದ ನಂತರ ಆರೋಪಿಗಳು ಆಂಧ್ರಪ್ರದೇಶದ ಚಿತ್ತೂರು ಜಿಲ್ಲೆಯ ಮೂಲಕ ಪರಾರಿಯಾಗಿದ್ದಾರೆ ಎಂದು ತಿಳಿದು ಬಂದಿದ್ದು, ಈ ಮಾರ್ಗದಲ್ಲಿ ಹಣ ಸಾಗಣೆಗಾಗಿ ಬಳಸಿದ್ದ ಕೆಲವು ಖಾಲಿ ಪೆಟ್ಟಿಗೆಗಳು ಪತ್ತೆಯಾಗಿವೆ.
ಚಿತ್ತೂರು ಜಿಲ್ಲೆಯ ಕುಪ್ಪಂ ತಾಲ್ಲೂಕಿನ ಕುರ್ಮಾನಿಪಲ್ಲಿಯ ನಿರ್ಜನ ಪ್ರದೇಶದಲ್ಲಿ ಸಿಎಂಎಸ್ (CMS) ಹಣ ಸಾಗಣೆ ವಾಹನದಲ್ಲಿ ನಗದು ತುಂಬಲು ಬಳಸುತ್ತಿದ್ದ ಬಾಕ್ಸ್ಗಳು (ಪೆಟ್ಟಿಗೆಗಳು) ಪತ್ತೆಯಾಗಿವೆ. ದರೋಡೆಕೋರರ ತಂಡವು ಬಹುತೇಕ ಹಣವನ್ನು ಲೂಟಿ ಮಾಡಿದ ಬಳಿಕ, ಈ ಖಾಲಿ ಬಾಕ್ಸ್ಗಳನ್ನು ಸ್ಥಳದಲ್ಲಿಯೇ ಎಸೆದು ಪರಾರಿಯಾಗಿದ್ದಾರೆ.
ಈ ಬೃಹತ್ ಕಳ್ಳತನ ಪ್ರಕರಣದ ತನಿಖೆಗಾಗಿ ವಿಶೇಷ ಪೊಲೀಸ್ ತಂಡಗಳನ್ನು ರಚಿಸಲಾಗಿದ್ದು, ಈಗಾಗಲೇ ಓರ್ವ ಪೊಲೀಸ್ ಕಾನ್ಸ್ಟೆಬಲ್ ಮತ್ತು ಮತ್ತೊಬ್ಬ ಸಿಬ್ಬಂದಿಯನ್ನು ವಿಚಾರಣೆಗಾಗಿ ವಶಕ್ಕೆ ತೆಗೆದುಕೊಳ್ಳಲಾಗಿದೆ. ಅವರ ವಿಚಾರಣೆಯ ಆಧಾರದ ಮೇಲೆ ಉಳಿದ ಪ್ರಮುಖ ಆರೋಪಿಗಳಿಗಾಗಿ ಶೋಧ ಕಾರ್ಯ ತೀವ್ರಗೊಂಡಿದೆ.
ದರೋಡೆಗೊಳಗಾದ ಒಟ್ಟು ₹7.11 ಕೋಟಿ ರೂಪಾಯಿ ನಗದಿನಲ್ಲಿ ಪೊಲೀಸರು ಈವರೆಗೆ ₹5 ಕೋಟಿ ರೂಪಾಯಿಯನ್ನು ವಶಪಡಿಸಿಕೊಂಡಿದ್ದಾರೆ. ಅಂದಾಜಿನ ಪ್ರಕಾರ, ದರೋಡೆ ಮಾಡಿದ ತಂಡವು ಇನ್ನೂ ಒಂದು ಕೋಟಿಗೂ ಹೆಚ್ಚು ಹಣದೊಂದಿಗೆ ತಪ್ಪಿಸಿಕೊಂಡಿದೆ. ಈ ಬೃಹತ್ ಸುಲಿಗೆಯ ಪ್ರಮುಖ ರೂವಾರಿಗಳು ಮತ್ತು ತಂಡದ ಸದಸ್ಯರನ್ನು ಬಂಧಿಸಲು ಪೊಲೀಸರು ವ್ಯಾಪಕ ಜಾಲವನ್ನು ಬೀಸಿದ್ದಾರೆ.
