ಹೆಬ್ರಿ: ಗ್ರಾಮ ಸಹಾಯಕರಿಗೆ ಸೂಕ್ತ ಸೌಲಭ್ಯ ಒದಗಿಸುವ ನಿಟ್ಟಿನಲ್ಲಿ ಹೆಬ್ರಿ ಗ್ರಾಮ ಪಂಚಾಯತ್ ಸದಸ್ಯರು ಮಾದರಿ ಕಾರ್ಯ ಮಾಡಿದ್ದಾರೆ. ಹೆಬ್ರಿ ಗ್ರಾಮ ಸಹಾಯಕನಾಗಿ ಕಾರ್ಯನಿರ್ವಹಿಸುತ್ತಿರುವ ವಿಜಯ್ ಅವರಿಗೆ, ಪಂಚಾಯತ್ನ ವಾರ್ಡ್ 3 ರ ಸದಸ್ಯರಾದ ಜನಾರ್ಧನ್ ಎಚ್ ಮತ್ತು ಸಂತೋಷ್ ನಾಯಕ್ ರವರ ಮುತುವರ್ಜಿಯಲ್ಲಿ ಬೈಸಿಕಲ್ ಕೊಡಿಸಿ ನೆರವಾಗಿದ್ದಾರೆ.
ಸಭಾ ಭತ್ಯೆಯಿಂದ ಸಹಾಯ
ಸದಸ್ಯರಾದ ಜನಾರ್ಧನ್ ಮತ್ತು ಸಂತೋಷ್ ನಾಯಕ್ ಅವರು ತಮ್ಮ ಸಭಾ ಭತ್ಯೆಯ ಗೌರವಧನದಿಂದ ಹಣವನ್ನು ಸಂಗ್ರಹಿಸಿ, ಈ ಸೈಕಲ್ ಅನ್ನು ಕೊಡಿಸಿರುವುದು ವಿಶೇಷವಾಗಿದೆ. ಗ್ರಾಮೀಣ ಭಾಗದ ತಳ ಮಟ್ಟದಲ್ಲಿ ವಿವಿಧ ಕೆಲಸಗಳನ್ನು ನಿರ್ವಹಿಸುವ ಗ್ರಾಮ ಸಹಾಯಕರಿಗೆ ನೀಡಿದ ಈ ಸಹಾಯವು ಸಾರ್ವಜನಿಕರ ಮೆಚ್ಚುಗೆ ಮತ್ತು ಪ್ರಶಂಸೆಗೆ ಪಾತ್ರವಾಗಿದೆ.
ಸೈಕಲ್ ಹಸ್ತಾಂತರ ಕಾರ್ಯಕ್ರಮದಲ್ಲಿ ಧಾರ್ಮಿಕ ಮುಂದಾಳು ಎಚ್. ಭಾಸ್ಕರ ಜೋಯಿಸ್, ಹಿರಿಯ ಸಹಕಾರಿ ಎಚ್. ಕೆ. ನಾರಾಯಣ್ ನಾಯ್ಕ್ ಮತ್ತು ಉದ್ಯಮಿ ಪ್ರಕಾಶ್ ಮಲ್ಯ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
