ಕೊಲಂಬಿಯಾ (ದಕ್ಷಿಣ ಅಮೆರಿಕ): ವಿಶ್ವದಾದ್ಯಂತ ವಿಮಾನಯಾನ ಸುರಕ್ಷತೆಯ ಬಗ್ಗೆ ತೀವ್ರ ಚರ್ಚೆಗಳು ನಡೆಯುತ್ತಿರುವ ಬೆನ್ನಲ್ಲೇ, ದಕ್ಷಿಣ ಅಮೆರಿಕದ ಕೊಲಂಬಿಯಾದಲ್ಲಿ ಅತ್ಯಂತ ಭೀಕರ ವಿಮಾನ ದುರಂತವೊಂದು ಸಂಭವಿಸಿದೆ. ಈ ಘಟನೆಯಲ್ಲಿ ಓರ್ವ ಪ್ರಭಾವಿ ಸಂಸದ ಹಾಗೂ ಚುನಾವಣಾ ಅಭ್ಯರ್ಥಿ ಸೇರಿದಂತೆ ಒಟ್ಟು 15 ಮಂದಿ ದಾರುಣವಾಗಿ ಸಾವನ್ನಪ್ಪಿದ್ದಾರೆ.
ಕೊಲಂಬಿಯಾದ ಸರ್ಕಾರಿ ಸ್ವಾಮ್ಯದ ‘ಸಟೇನಾ’ (Satena) ಏರ್ಲೈನ್ಸ್ಗೆ ಸೇರಿದ ಬೀಚ್ಕ್ರಾಫ್ಟ್ 1900 ಮಾದರಿಯ ವಿಮಾನವು ಕುಕುಟಾ ನಗರದಿಂದ ಒಕಾನಾ ಕಡೆಗೆ ಪ್ರಯಾಣ ಬೆಳೆಸಿತ್ತು. ಟೇಕಾಫ್ ಆದ ಕೇವಲ 12 ನಿಮಿಷಗಳಲ್ಲೇ ನಿಯಂತ್ರಣ ಗೋಪುರದೊಂದಿಗಿನ ಸಂಪರ್ಕವನ್ನು ಕಳೆದುಕೊಂಡ ಈ ವಿಮಾನವು, ಪರ್ವತ ಶ್ರೇಣಿಗಳ ಮಧ್ಯೆ ಪತನಗೊಂಡಿದೆ. ವಿಮಾನದಲ್ಲಿದ್ದ 13 ಪ್ರಯಾಣಿಕರು ಹಾಗೂ ಇಬ್ಬರು ಪೈಲಟ್ಗಳು ಸೇರಿದಂತೆ ಯಾರೊಬ್ಬರೂ ಬದುಕುಳಿದಿಲ್ಲ ಎಂದು ವಿಮಾನಯಾನ ಪ್ರಾಧಿಕಾರ ಅಧಿಕೃತವಾಗಿ ಘೋಷಿಸಿದೆ.
ಮೃತರ ಪೈಕಿ ಕೊಲಂಬಿಯಾದ ಜನಪ್ರಿಯ ಸಂಸದ ಡಯೋಜಿನಸ್ ಕ್ವಿಂಟೆರೊ ಮತ್ತು ಮುಂಬರುವ ಚುನಾವಣೆಯ ಅಭ್ಯರ್ಥಿ ಕಾರ್ಲೋಸ್ ಸಲ್ಸೆಡೊ ಸೇರಿದ್ದಾರೆ. ದುರಂತ ಸಂಭವಿಸಿದ ಕುಕುಟಾ ಮತ್ತು ಒಕಾನಾ ನಡುವಿನ ಪ್ರದೇಶವು ಕಡಿದಾದ ಬೆಟ್ಟಗುಡ್ಡಗಳಿಂದ ಕೂಡಿದ್ದು, ಪ್ರತಿಕೂಲ ಹವಾಮಾನವೇ ಈ ಅಪಘಾತಕ್ಕೆ ಪ್ರಾಥಮಿಕ ಕಾರಣವೆಂದು ಶಂಕಿಸಲಾಗಿದೆ. ಅಲ್ಲದೆ, ಈ ಭಾಗವು ಗೆರಿಲ್ಲಾ ಸಶಸ್ತ್ರ ಗುಂಪುಗಳ ಪ್ರಭಾವಕ್ಕೆ ಒಳಪಟ್ಟಿರುವುದರಿಂದ ರಕ್ಷಣಾ ಕಾರ್ಯಾಚರಣೆಯು ಸವಾಲಾಗಿ ಪರಿಣಮಿಸಿತ್ತು. ಆದರೂ ಸರ್ಕಾರವು ವಿಶೇಷ ರಕ್ಷಣಾ ಪಡೆಗಳನ್ನು ನಿಯೋಜಿಸಿ ಮೃತದೇಹಗಳನ್ನು ಹೊರತೆಗೆಯುವ ಪ್ರಯತ್ನ ಮುಂದುವರಿಸಿದೆ.
