ಮೂಡಿಗೆರೆ: ಕುಡಿತದ ಚಟ ಹಾಗೂ ಮನೆಯೊಳಗಿನ ನಿರಂತರ ಜಗಳ ಇಂದು ಒಂದು ಜೀವವನ್ನು ಬಲಿಪಡೆದಿದೆ. ಮೂಡಿಗೆರೆ ತಾಲ್ಲೂಕಿನ ಆನೆಗುಂಡಿ ಗ್ರಾಮದಲ್ಲಿ ಜನವರಿ 3ರ ಶನಿವಾರದಂದು ತಂದೆಯೇ ತನ್ನ ಸ್ವಂತ ಮಗನನ್ನು ಮಚ್ಚಿನಿಂದ ಹಲ್ಲೆ ನಡೆಸಿ ಬರ್ಬರವಾಗಿ ಹತ್ಯೆ ಮಾಡಿದ ಘಟನೆ ನಡೆದಿದೆ. 29 ವರ್ಷದ ಪ್ರದೀಪ್ ಆಚಾರ್ ಸಾವನ್ನಪ್ಪಿದ ದುರ್ದೈವಿ.
ಹಿನ್ನೆಲೆ: ಮೃತ ಪ್ರದೀಪ್ ಹಾಗೂ ತಂದೆ ರಮೇಶ್ ಆಚಾರ್ ನಡುವೆ ಕಳೆದ ಹಲವು ಸಮಯದಿಂದ ಕ್ಷುಲ್ಲಕ ವಿಚಾರಕ್ಕೆ ಗಲಾಟೆಗಳು ನಡೆಯುತ್ತಿದ್ದವು. ಈ ಇಬ್ಬರೂ ಮದ್ಯಪಾನಕ್ಕೆ ದಾಸರಾಗಿದ್ದು, ಮನೆಯಲ್ಲಿ ಪ್ರತಿದಿನ ಕಲಹ ಸೃಷ್ಟಿಯಾಗುತ್ತಿತ್ತು. ತಂದೆ-ಮಗನ ಕಿರುಕುಳ ತಾಳಲಾರದೆ ಪ್ರದೀಪ್ ಅವರ ತಾಯಿ ಈಗಾಗಲೇ ಮನೆ ತೊರೆದು ಬೇರೆಡೆ ವಾಸವಿದ್ದರು. ಮನೆಯಲ್ಲಿ ಕೇವಲ ತಂದೆ ಮತ್ತು ಮಗ ಇಬ್ಬರೇ ಇದ್ದ ಸಂದರ್ಭದಲ್ಲಿ ಈ ದುರಂತ ಸಂಭವಿಸಿದೆ.
ಘಟನೆ ನಡೆದ ರೀತಿ: ಶನಿವಾರ ರಾತ್ರಿ ಕೂಡ ಮದ್ಯದ ಅಮಲಿನಲ್ಲಿದ್ದ ರಮೇಶ್ ಆಚಾರ್ ಮತ್ತು ಪ್ರದೀಪ್ ನಡುವೆ ತೀವ್ರ ಮಾತಿನ ಚಕಮಕಿ ನಡೆದಿದೆ. ಈ ವೇಳೆ ಆಕ್ರೋಶಗೊಂಡ ರಮೇಶ್ ಮನೆಯಲ್ಲಿದ್ದ ಮಚ್ಚಿನಿಂದ ಮಗನ ಮೇಲೆ ದಾಳಿ ನಡೆಸಿದ್ದಾನೆ. ಮಚ್ಚಿನ ಏಟಿನಿಂದ ತೀವ್ರ ಗಾಯಗೊಂಡ ಪ್ರದೀಪ್ ಚಿಕಿತ್ಸೆ ಸಿಗದೆ ಇಡೀ ರಾತ್ರಿ ರಕ್ತಸ್ರಾವದಿಂದ ಒದ್ದಾಡಿ ಪ್ರಾಣಬಿಟ್ಟಿದ್ದಾನೆ.
ಬೆಳಕಿಗೆ ಬಂದ ಪ್ರಕರಣ: ಭಾನುವಾರ ಬೆಳಿಗ್ಗೆ ಆರೋಪಿ ರಮೇಶ್ ಮಗನ ಮೃತದೇಹವನ್ನು ಮನೆಯ ಒಳಗಿನಿಂದ ಹೊರಭಾಗಕ್ಕೆ ಎಳೆದುಕೊಂಡು ಬರುತ್ತಿದ್ದ ದೃಶ್ಯವನ್ನು ಗಮನಿಸಿದ ಗ್ರಾಮಸ್ಥರು ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ವಿಷಯ ತಿಳಿಯುತ್ತಿದ್ದಂತೆಯೇ ಬಾಳೂರು ಠಾಣಾ ಪೊಲೀಸರು ಸ್ಥಳಕ್ಕೆ ಧಾವಿಸಿ ಆರೋಪಿಯನ್ನು ಬಂಧಿಸಿದ್ದಾರೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಜೀತೇಂದ್ರ ಕುಮಾರ್ ದಯಾಮ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಸದ್ಯ ಪ್ರಕರಣ ದಾಖಲಾಗಿದ್ದು, ಹೆಚ್ಚಿನ ತನಿಖೆ ಮುಂದುವರಿದಿದೆ.
