ಹೊಸದಿಲ್ಲಿ: ವಿದ್ಯಾರ್ಥಿಗಳ ಆರೋಗ್ಯ ಕಾಳಜಿಗೆ ಸದಾ ಆದ್ಯತೆ ನೀಡುವ ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ (ಸಿಬಿಎಸ್‌ಇ) ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಎರಡು ತಿಂಗಳ ಹಿಂದೆ ಸಕ್ಕರೆ ಅಂಶದ ಅತಿ ಸೇವನೆಯ ದುಷ್ಪರಿಣಾಮಗಳ ಬಗ್ಗೆ ಜಾಗೃತಿ ಮೂಡಿಸಲು “ಶುಗರ್‌ ಬೋರ್ಡ್‌” ಸ್ಥಾಪಿಸುವಂತೆ ತನ್ನ ಅಧೀನದಲ್ಲಿರುವ ಶಾಲೆಗಳಿಗೆ ನಿರ್ದೇಶನ ನೀಡಿತ್ತು. ಈಗ, ಅದೇ ಮಾದರಿಯಲ್ಲಿ “ಆಯಿಲ್ ಬೋರ್ಡ್‌” ಸ್ಥಾಪಿಸಲು ಆದೇಶಿಸಿದೆ. ಅತಿ ಹೆಚ್ಚು ಕೊಬ್ಬು ಮತ್ತು ಎಣ್ಣೆ ಇರುವ ಆಹಾರ ಪದಾರ್ಥಗಳ ಸೇವನೆಯಿಂದಾಗುವ ಆರೋಗ್ಯ ಸಮಸ್ಯೆಗಳ ಬಗ್ಗೆ ವಿದ್ಯಾರ್ಥಿಗಳು ಹಾಗೂ ಶಾಲಾ ಸಿಬ್ಬಂದಿಯಲ್ಲಿ ಅರಿವು ಮೂಡಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.
ಈ ನೂತನ ಆದೇಶದ ಪ್ರಕಾರ, ಶಾಲಾ ಆವರಣದಲ್ಲಿರುವ ಕೆಫೆಟೇರಿಯಾ, ಕ್ಯಾಂಟೀನ್ ಮತ್ತು ಸಭಾ ಕೊಠಡಿಗಳಲ್ಲಿ ಅಧಿಕ ಕೊಬ್ಬು ಮತ್ತು ಎಣ್ಣೆ ಅಂಶವಿರುವ ಆಹಾರ ಪದಾರ್ಥಗಳ ಸೇವನೆಯ ಅಪಾಯಗಳ ಕುರಿತ ಮಾಹಿತಿ ಫಲಕಗಳನ್ನು ಅಳವಡಿಸಬೇಕು. ಇವು ಪೋಸ್ಟರ್‌ ರೂಪದಲ್ಲಿರಬಹುದು ಅಥವಾ ಡಿಜಿಟಲ್ ಡಿಸ್‌ಪ್ಲೇಗಳ ಮೂಲಕವೂ ಪ್ರದರ್ಶಿಸಬಹುದಾಗಿದೆ. ಇದಲ್ಲದೆ, ಶೈಕ್ಷಣಿಕ ಪಠ್ಯಪುಸ್ತಕಗಳು ಹಾಗೂ ಇನ್ನಿತರ ಮುದ್ರಿತ ಸಾಮಗ್ರಿಗಳಲ್ಲಿಯೂ ಈ ಕುರಿತು ಜಾಗೃತಿ ಮೂಡಿಸುವ ಅಂಶಗಳನ್ನು ಸೇರಿಸುವಂತೆ ಸಿಬಿಎಸ್‌ಇ ತನ್ನ ನಿರ್ದೇಶನದಲ್ಲಿ ಸ್ಪಷ್ಟಪಡಿಸಿದೆ.
ಆರೋಗ್ಯಕರ ಆಹಾರ ಪದ್ಧತಿಗಳನ್ನು ಬಾಲ್ಯದಿಂದಲೇ ಅಳವಡಿಸಿಕೊಳ್ಳಲು ಉತ್ತೇಜಿಸುವುದು, ಬೊಜ್ಜು ಮತ್ತು ಅದಕ್ಕೆ ಸಂಬಂಧಿಸಿದ ಆರೋಗ್ಯ ಸಮಸ್ಯೆಗಳನ್ನು ತಡೆಗಟ್ಟುವುದು ಈ ಕ್ರಮದ ಹಿಂದಿರುವ ಮಂಡಳಿಯ ದೂರದೃಷ್ಟಿಯಾಗಿದೆ. ಮಕ್ಕಳು ಶಾಲಾ ದಿನಗಳಿಂದಲೇ ತಮ್ಮ ಆಹಾರ ಸೇವನೆಯ ಬಗ್ಗೆ ಪ್ರಜ್ಞಾಪೂರ್ವಕವಾಗಿರಲು ಇದು ಸಹಕಾರಿಯಾಗಲಿದೆ ಎಂದು ಸಿಬಿಎಸ್‌ಇ ಆಶಿಸಿದೆ. ಈ ಮೂಲಕ ಭವಿಷ್ಯದ ನಾಗರಿಕರು ಸದೃಢ ದೇಹ ಮತ್ತು ಮನಸ್ಸಿನಿಂದ ಬೆಳೆಯಲು ಅನುಕೂಲವಾಗಲಿದೆ.
