ಬೆಂಗಳೂರು: ಭಾರತದ ಪ್ರಮುಖ ಸಾರ್ವಜನಿಕ ವಲಯದ ಬ್ಯಾಂಕ್ಗಳಲ್ಲಿ ಒಂದಾದ ಕೆನರಾ ಬ್ಯಾಂಕ್, 2025-26ನೇ ಹಣಕಾಸು ವರ್ಷದ ತನ್ನ ವಾರ್ಷಿಕ ಮತ್ತು ನಾಲ್ಕನೇ ತ್ರೈಮಾಸಿಕದ ಆರ್ಥಿಕ ಸಾಧನೆಯನ್ನು ಹೊರಹಾಕಿದೆ. ಬ್ಯಾಂಕ್ನ ಒಟ್ಟಾರೆ ಲಾಭದಲ್ಲಿ ಗಣನೀಯ ಏರಿಕೆ ಕಂಡುಬಂದಿದ್ದು, ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ತನ್ನ ಭದ್ರತೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
ಬ್ಯಾಂಕ್ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಹರ್ದೀಪ್ ಸಿಂಗ್ ಅಹ್ಲುವಾಲಿಯಾ ಅವರು ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿ, ಬ್ಯಾಂಕ್ ಈ ವರ್ಷ ಅತ್ಯುತ್ತಮ ಪ್ರಗತಿ ಸಾಧಿಸಿದೆ ಎಂದು ಹರ್ಷ ವ್ಯಕ್ತಪಡಿಸಿದರು. ವಿಶೇಷವಾಗಿ ಹೂಡಿಕೆದಾರರು ಮತ್ತು ಗ್ರಾಹಕರಲ್ಲಿ ವಿಶ್ವಾಸ ಮೂಡಿಸುವಂತೆ ಬ್ಯಾಂಕ್ನ ಅನುತ್ಪಾದಕ ಆಸ್ತಿ (NPA) ಪ್ರಮಾಣದಲ್ಲಿ ಭಾರಿ ಇಳಿಕೆಯಾಗಿರುವುದು ಈ ಬಾರಿಯ ಫಲಿತಾಂಶದ ಹೈಲೈಟ್ ಆಗಿದೆ.
ಗ್ರಾಹಕರ ಠೇವಣಿ ಮತ್ತು ಸಾಲ ವಿತರಣೆಯಲ್ಲೂ ಬ್ಯಾಂಕ್ ಎರಡಂಕಿ ಪ್ರಗತಿಯನ್ನು ಕಾಯ್ದುಕೊಂಡಿದೆ. ಆರ್ಥಿಕ ವರ್ಷದ ಅಂತ್ಯಕ್ಕೆ ಬ್ಯಾಂಕ್ನ ನಿವ್ವಳ ಲಾಭವು 19,187 ಕೋಟಿ ರೂ. ತಲುಪುವ ಮೂಲಕ ಶೇ. 12.70 ರಷ್ಟು ಬೆಳವಣಿಗೆಯನ್ನು ದಾಖಲಿಸಿದೆ. ಇದು ಕಳೆದ ಸಾಲಿಗಿಂತ ಸುಮಾರು 2,000 ಕೋಟಿ ರೂ. ಹೆಚ್ಚು ಲಾಭ ಎಂಬುದು ಗಮನಾರ್ಹ.
ಕೆನರಾ ಬ್ಯಾಂಕ್ ಆರ್ಥಿಕ ಫಲಿತಾಂಶದ ಪ್ರಮುಖ ಅಂಶಗಳು:
- ವಾರ್ಷಿಕ ನಿವ್ವಳ ಲಾಭ: 19,187 ಕೋಟಿ ರೂ. (ಶೇ. 12.70 ರಷ್ಟು ಏರಿಕೆ).
- ಕೊನೆಯ ತ್ರೈಮಾಸಿಕದ ಲಾಭ: 4,506 ಕೋಟಿ ರೂ.
- ಅನುತ್ಪಾದಕ ಆಸ್ತಿ (Gross NPA): ಶೇ. 2.94 ರಿಂದ ಶೇ. 1.84 ಕ್ಕೆ ಇಳಿಕೆ.
- ನಿವ್ವಳ NPA: ಶೇ. 0.43 ಕ್ಕೆ ಇಳಿಕೆಯಾಗುವ ಮೂಲಕ ಆಸ್ತಿ ಗುಣಮಟ್ಟ ಸುಧಾರಣೆ.
- ದೇಶೀಯ ಠೇವಣಿ: 14.36 ಲಕ್ಷ ಕೋಟಿ ರೂ. (ಶೇ. 7.95 ರಷ್ಟು ವೃದ್ಧಿ).
- ಸಾಲ ವಿತರಣೆ: 11.61 ಲಕ್ಷ ಕೋಟಿ ರೂ. (ಶೇ. 15.12 ರಷ್ಟು ಏರಿಕೆ).
- ನಿರ್ವಹಣಾ ಆದಾಯ: 33,019 ಕೋಟಿ ರೂ. ಗಳಿಕೆ.
ಬ್ಯಾಂಕ್ ತನ್ನ ಜಾಗತಿಕ ವಹಿವಾಟಿನಲ್ಲೂ ಉತ್ತಮ ಹೆಜ್ಜೆಗುರುತು ಮೂಡಿಸಿದೆ. ಜಾಗತಿಕ ಮಟ್ಟದಲ್ಲಿ ಬ್ಯಾಂಕ್ನ ಒಟ್ಟು ಠೇವಣಿ 15.68 ಕೋಟಿ ರೂ. ದಾಟಿದ್ದು, ಸಾಲ ವಿತರಣೆಯಲ್ಲೂ ಶೇ. 15.30 ರಷ್ಟು ಚೇತರಿಕೆ ಕಂಡಿದೆ. ಬ್ಯಾಂಕ್ನ ಆಸ್ತಿಗಳ ಮೇಲಿನ ಲಾಭಾಂಶ (ROA) ಸಹ ಶೇ. 1.10 ಕ್ಕೆ ಏರಿಕೆಯಾಗಿದ್ದು, ಕಾರ್ಯಕ್ಷಮತೆಯಲ್ಲಿ ಸ್ಥಿರತೆಯನ್ನು ಕಾಯ್ದುಕೊಂಡಿದೆ. ಸಾಲದ ಗುಣಮಟ್ಟವನ್ನು ಉತ್ತಮಪಡಿಸಿಕೊಳ್ಳುವಲ್ಲಿ ಬ್ಯಾಂಕ್ ಮ್ಯಾನೇಜ್ಮೆಂಟ್ ಯಶಸ್ವಿಯಾಗಿದೆ ಎಂದು ಅಹ್ಲುವಾಲಿಯಾ ವಿವರಿಸಿದರು.
