ಬೆಂಗಳೂರು: ಧರ್ಮಸ್ಥಳ ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಿನ್ನಯ್ಯ ಬುರುಡೆಗೆ ತಮ್ಮ ಬೆಂಗಳೂರಿನ ಮನೆಯಲ್ಲಿ ಮೂರು ದಿನಗಳ ಕಾಲ ಆಶ್ರಯ ನೀಡಿದ್ದನ್ನು ಮತ್ತು ಅವರೊಂದಿಗೆ ದೆಹಲಿಗೆ ಪ್ರಯಾಣಿಸಿದ್ದನ್ನು ಜಯಂತ್ ಟಿ. ಅವರು ಖಚಿತಪಡಿಸಿದ್ದಾರೆ. ಶನಿವಾರ ಖಾಸಗಿ ಸುದ್ದಿವಾಹಿನಿಗಳಿಗೆ ನೀಡಿದ ಹೇಳಿಕೆಯಲ್ಲಿ ಅವರು ಈ ವಿಷಯ ತಿಳಿಸಿದ್ದಾರೆ.
ಜಯಂತ್ ಅವರ ಹೇಳಿಕೆಯ ಪ್ರಕಾರ, ಗಿರೀಶ್ ಮಟ್ಟಣ್ಣನವರ್ ಅವರ ಸೂಚನೆಯಂತೆ, ಸ್ಯಾಟಲೈಟ್ ಬಸ್ ನಿಲ್ದಾಣದಿಂದ ಚಿನ್ನಯ್ಯನನ್ನು ವಕೀಲರೊಬ್ಬರ ಕಚೇರಿಗೆ ಕರೆದೊಯ್ಯಲಾಗಿತ್ತು. ನಂತರ, ಸುರಕ್ಷಿತ ಸ್ಥಳದ ಅವಶ್ಯಕತೆ ಇದೆ ಎಂದು ಚಿನ್ನಯ್ಯ ಹೇಳಿದ ಕಾರಣ, ಜಯಂತ್ ಅವರು ತಮ್ಮ ಮನೆಯಲ್ಲಿ ಆತನಿಗೆ ಮೂರು ದಿನ ಆಶ್ರಯ ನೀಡಿ, ಊಟದ ವ್ಯವಸ್ಥೆ ಮಾಡಿದ್ದರು. ಈ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ಮಹಜರು ನಡೆಸಲು ಜಯಂತ್ ಅವರ ಬೆಂಗಳೂರಿನ ಮನೆಗೆ ಭೇಟಿ ನೀಡಿದ್ದಾರೆ.
ಜಯಂತ್ ಅವರ ಪ್ರಕಾರ, ಚಿನ್ನಯ್ಯನ ಪರಿಚಯ ಅವರಿಗೆ 4 ತಿಂಗಳ ಹಿಂದೆ ಆಗಿದೆ. ಚಿನ್ನಯ್ಯ ಮನೆಗೆ ಒಂದು “ಬುರುಡೆ” ತಂದಿದ್ದ, ಅದರ ಫೋಟೋ ತೆಗೆಯಲಾಗಿತ್ತು. ನಂತರ ಜಯಂತ್, ಮಟ್ಟಣ್ಣನವರ್, ಸುಜಾತಾ ಭಟ್ ಮತ್ತು ಚಿನ್ನಯ್ಯ ಸೇರಿ ಬಾಡಿಗೆ ಕಾರಿನಲ್ಲಿ ದೆಹಲಿಗೆ ತೆರಳಿದ್ದರು. ಅಲ್ಲಿ ಅವರು ಸುಪ್ರೀಂ ಕೋರ್ಟ್ಗೆ ಭೇಟಿ ನೀಡಿ ಬಂದಿದ್ದಾರೆ. ಆ “ಬುರುಡೆ”ಯನ್ನು ಚಿನ್ನಯ್ಯನೇ ತಂದಿದ್ದ, ಆದರೆ ಎಲ್ಲಿಂದ ತಂದಿದ್ದ ಎಂಬುದು ತನಗೆ ಗೊತ್ತಿಲ್ಲ ಎಂದು ಜಯಂತ್ ಹೇಳಿದ್ದಾರೆ. ಈ ಷಡ್ಯಂತ್ರದಲ್ಲಿ ತಾವು ಭಾಗಿಯಾಗಿಲ್ಲ, ಕೇವಲ ಆಶ್ರಯ ನೀಡಿದ್ದಕ್ಕಾಗಿ ಬಂಧಿಸುವುದಾದರೆ ಬಂಧಿಸಲಿ ಎಂದು ಅವರು ತಿಳಿಸಿದ್ದಾರೆ.
ಸುಮಾರು ಒಂದು ವರ್ಷದ ಹಿಂದೆ ಈ ಎಲ್ಲರೂ ಒಬ್ಬ ಸ್ವಾಮೀಜಿಯನ್ನು ಭೇಟಿ ಮಾಡಿದ್ದಾಗ, ಕಾನೂನಿನ ಪ್ರಕಾರ ಮುಂದುವರಿಯುವಂತೆ ಅವರು ಸಲಹೆ ನೀಡಿದ್ದರು ಎಂದು ಜಯಂತ್ ಹೇಳಿದ್ದಾರೆ. ಆ ಸ್ವಾಮೀಜಿ ಯಾರು ಎಂಬುದನ್ನು ಅವರು ಬಹಿರಂಗಪಡಿಸಲು ನಿರಾಕರಿಸಿದ್ದಾರೆ. ಜಯಂತ್ ಅವರ ಪ್ರಕಾರ, ಚಿನ್ನಯ್ಯ ಉದ್ದೇಶಪೂರ್ವಕವಾಗಿಯೇ ಮೃತದೇಹ ಹೂತ ಸ್ಥಳದ ಬಗ್ಗೆ ತಪ್ಪು ಮಾಹಿತಿ ನೀಡುತ್ತಿರುವಂತಿದೆ. ಈ ಪ್ರಕರಣದ ತನಿಖೆ ಮುಂದುವರೆದಿದ್ದು, ಜಯಂತ್ ಅವರ ಹೇಳಿಕೆಗಳು ಹೊಸ ಆಯಾಮ ನೀಡಿವೆ.
