ಮಧ್ಯಪ್ರದೇಶದ ಪನ್ನಾ ಹುಲಿ ಅಭಯಾರಣ್ಯದ ಹೆಮ್ಮೆಯಾಗಿದ್ದ, ಏಷ್ಯಾದ ಅತ್ಯಂತ ಹಿರಿಯ ಆನೆ ಎಂಬ ಖ್ಯಾತಿಗೆ ಪಾತ್ರವಾಗಿದ್ದ ‘ವತ್ಸಲಾ’ ಮಂಗಳವಾರ, ಜುಲೈ 8 ರಂದು ಇಹಲೋಕ ತ್ಯಜಿಸಿದೆ. 100 ವರ್ಷಗಳಿಗೂ ಹೆಚ್ಚು ಕಾಲ ಬದುಕಿದ್ದ ಈ ಆನೆ, ತನ್ನ ದೀರ್ಘಾವಧಿಯ ಜೀವನದಿಂದಾಗಿ ಎಲ್ಲರ ಗಮನ ಸೆಳೆದಿತ್ತು. ವತ್ಸಲಾಳ ನಿಧನವು ಅರಣ್ಯ ಇಲಾಖೆ ಹಾಗೂ ಪ್ರಾಣಿಪ್ರಿಯರಲ್ಲಿ ದುಃಖವನ್ನುಂಟು ಮಾಡಿದೆ.
ಅಧಿಕೃತ ಮೂಲಗಳ ಪ್ರಕಾರ, ವತ್ಸಲಾ ಕಳೆದ ಕೆಲವು ದಿನಗಳಿಂದ ವಯೋಸಹಜ ದೌರ್ಬಲ್ಯದಿಂದ ಬಳಲುತ್ತಿತ್ತು. ಅದರ ಮುಂಭಾಗದ ಕಾಲ್ಬೆರಳ ಉಗುರುಗಳಲ್ಲಿ ಗಾಯಗಳಾಗಿದ್ದವು. ಹಿನೌಟಾ ಪ್ರದೇಶದ ಖೈರೈಯಾನ್ ನಾಲಾ ಸಮೀಪ ಮಲಗಿದ್ದ ವತ್ಸಲಾ, ಎಬ್ಬಿಸಲು ಮಾಡಿದ ಎಲ್ಲಾ ಪ್ರಯತ್ನಗಳ ಹೊರತಾಗಿಯೂ ಏಳಲಾಗದೆ, ಮಧ್ಯಾಹ್ನ 1:30 ರ ಸುಮಾರಿಗೆ ಅಸುನೀಗಿತು. ಅಭಯಾರಣ್ಯದ ಅಧಿಕಾರಿಗಳು ಸಂಪೂರ್ಣ ಗೌರವಗಳೊಂದಿಗೆ ವತ್ಸಲಾಳ ಅಂತ್ಯಕ್ರಿಯೆಯನ್ನು ನೆರವೇರಿಸಿದರು.
ಪಿಟಿಐ ವರದಿಗಳ ಪ್ರಕಾರ, ವತ್ಸಲಾವನ್ನು ಮೂಲತಃ ಕೇರಳದಿಂದ ನರ್ಮದಾಪುರಂಗೆ ತರಲಾಗಿತ್ತು. ನಂತರ ಅದನ್ನು ಪನ್ನಾ ಹುಲಿ ಅಭಯಾರಣ್ಯಕ್ಕೆ ಸ್ಥಳಾಂತರಿಸಲಾಯಿತು. ವೃದ್ಧಾಪ್ಯದಿಂದಾಗಿ ವತ್ಸಲಾ ಕಣ್ಣಿನ ದೃಷ್ಟಿ ಕಳೆದುಕೊಂಡಿದ್ದಳು ಮತ್ತು ದೂರ ಪ್ರಯಾಣಿಸಲು ಅಸಮರ್ಥಳಾಗಿದ್ದಳು. ಆದ್ದರಿಂದ, ಅದನ್ನು ಗಸ್ತು ತಿರುಗುವಿಕೆಯಂತಹ ನಿಯಮಿತ ಕರ್ತವ್ಯಗಳಿಂದ ಮುಕ್ತಗೊಳಿಸಲಾಗಿತ್ತು. ವತ್ಸಲಾವನ್ನು ಹಿನುಟಾ ಆನೆ ಶಿಬಿರದಲ್ಲಿ ಇರಿಸಲಾಗಿತ್ತು. ಅಲ್ಲಿ ಪ್ರತಿದಿನ ಸ್ನಾನ ಮಾಡಿಸಲು ಖೈರೈಯಾನ್ ನಾಲಾಕ್ಕೆ ಕರೆದೊಯ್ಯಲಾಗುತ್ತಿತ್ತು. ವತ್ಸಲಾಳಂತಹ ಅಪರೂಪದ ಮತ್ತು ದೀರ್ಘಾಯುಷಿ ಆನೆಯ ನಿಧನವು ವನ್ಯಜೀವಿ ಸಂರಕ್ಷಣೆಯ ಮಹತ್ವವನ್ನು ಮತ್ತೊಮ್ಮೆ ಎತ್ತಿ ತೋರಿಸುತ್ತದೆ.
