ಮುಂಬಯಿ : ಮಹಾರಾಷ್ಟ್ರ ರಾಜಕಾರಣದ ದ್ರುವತಾರೆ, ಆಡಳಿತ ಚತುರ ಹಾಗೂ ಉಪಮುಖ್ಯಮಂತ್ರಿ ಅಜಿತ್ ಪವಾರ್ (66) ಬುಧವಾರ ಸಂಭವಿಸಿದ ಭೀಕರ ವಿಮಾನ ಅಪಘಾತದಲ್ಲಿ ಅಕಾಲಿಕ ಮರಣಕ್ಕೀಡಾಗಿದ್ದಾರೆ. ಆಶ್ಚರ್ಯವೆಂದರೆ, ತಮ್ಮ ರಾಜಕೀಯ ಜೀವನದ ಏರಿಳಿತಗಳಿಗೆ ಸಾಕ್ಷಿಯಾಗಿದ್ದ ಹಾಗೂ ಸತತ 8 ಬಾರಿ ವಿಜಯಪತಾಕೆ ಹಾರಿಸಿದ್ದ ಸ್ವಕ್ಷೇತ್ರ ಬಾರಾಮತಿಯ ಮಣ್ಣಿನಲ್ಲೇ ಅವರು ಕೊನೆಯುಸಿರೆಳೆದಿರುವುದು ಅಭಿಮಾನಿಗಳಲ್ಲಿ ತೀವ್ರ ಶೋಕ ತರಿಸಿದೆ. “ಅಜಿತ್ ದಾದಾ” ಎಂದೇ ಜನಪ್ರಿಯರಾಗಿದ್ದ ಅವರು, ಮೌಲ್ಯಯುತ ರಾಜಕಾರಣಕ್ಕಿಂತಲೂ ಪ್ರಾಯೋಗಿಕ ಮತ್ತು ತಂತ್ರಗಾರಿಕೆಯ ರಾಜಕೀಯಕ್ಕೆ ಹೆಸರಾಗಿದ್ದರು.
1959, ಜುಲೈ 22 ರಂದು ಜನಿಸಿದ ಅಜಿತ್ ಪವಾರ್, ಸಹಕಾರಿ ವಲಯದ ಮೂಲಕ ಸಾರ್ವಜನಿಕ ಜೀವನಕ್ಕೆ ಕಾಲಿಟ್ಟವರು. ಶರದ್ ಪವಾರ್ ಅವರ ನೆರಳಿನಲ್ಲಿ ಬೆಳೆದರೂ, ನಂತರದ ದಿನಗಳಲ್ಲಿ ತಮ್ಮದೇ ಆದ ಪ್ರತ್ಯೇಕ ಅಸ್ತಿತ್ವ ಕಂಡುಕೊಂಡರು. 1991 ರಲ್ಲಿ ಬಾರಾಮತಿ ಲೋಕಸಭಾ ಕ್ಷೇತ್ರದಿಂದ ಸಂಸತ್ ಪ್ರವೇಶಿಸಿದ ಇವರು, ನಂತರ ದೊಡ್ಡಪ್ಪ ಶರದ್ ಪವಾರ್ಗಾಗಿ ಸ್ಥಾನ ಬಿಟ್ಟುಕೊಟ್ಟು ವಿಧಾನಸಭಾ ರಾಜಕಾರಣಕ್ಕೆ ಮರಳಿದರು. ಅಲ್ಲಿಂದ ಆರಂಭವಾದ ಅವರ ವಿಜಯಯಾತ್ರೆ ಸತತ ಎಂಟು ಬಾರಿ ಮುಂದುವರಿದಿತ್ತು. ನೀರಾವರಿ, ಗ್ರಾಮೀಣಾಭಿವೃದ್ಧಿ ಹಾಗೂ ಜಲಸಂಪನ್ಮೂಲ ಸಚಿವರಾಗಿ ಅವರು ರಾಜ್ಯದ ಅಭಿವೃದ್ಧಿಗೆ ಮಹತ್ತರ ಕೊಡುಗೆ ನೀಡಿದ್ದರು.
ಅಜಿತ್ ಪವಾರ್ ಅವರ ರಾಜಕೀಯ ಜೀವನದ ಅತ್ಯಂತ ಸಂಚಲನಾತ್ಮಕ ನಿರ್ಧಾರವೆಂದರೆ ಶರದ್ ಪವಾರ್ ಅವರ ವಿರುದ್ಧದ ಬಂಡಾಯ. 2019 ರಲ್ಲಿ ಬಿಜೆಪಿ ಜೊತೆ ಕೈಜೋಡಿಸಿ ಡಿಸಿಎಂ ಆಗಿ ಪ್ರಮಾಣವಚನ ಸ್ವೀಕರಿಸಿದ್ದ ಅವರು, ಕೇವಲ 80 ಗಂಟೆಗಳಲ್ಲಿ ಸರ್ಕಾರ ಪತನಗೊಂಡ ನಂತರ ಮರಳಿ ಎನ್ಸಿಪಿಗೆ ಬಂದಿದ್ದರು. ಆದರೆ, 2024 ರ ಅವಧಿಯಲ್ಲಿ ಮತ್ತೆ ಬಂಡಾಯವೆದ್ದು, ಅಧಿಕೃತ ಎನ್ಸಿಪಿ ಪಕ್ಷದ ಹೆಸರು ಮತ್ತು ಚಿಹ್ನೆಯನ್ನು ತನ್ನದಾಗಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರು. ಆರು ಬಾರಿ ಉಪಮುಖ್ಯಮಂತ್ರಿಯಾಗಿ ದಾಖಲೆ ಬರೆದಿದ್ದ ಪವಾರ್, ಪತ್ನಿ ಸುನೇತ್ರಾ ಹಾಗೂ ಇಬ್ಬರು ಪುತ್ರರನ್ನು ಅಗಲಿದ್ದಾರೆ. ಅವರ ನಿಧನವು ಮರಾಠಾ ರಾಜಕಾರಣದ ಒಂದು ದೊಡ್ಡ ಶಕ್ತಿಯ ಅಂತ್ಯಕ್ಕೆ ನಾಂದಿ ಹಾಡಿದೆ.
