ಅಹಮದಾಬಾದ್: ಮದುವೆಯಾಗಿ ಸಂಸಾರ ಹೂಡಲು ತನ್ನ ವಿವಾಹಿತ ಪ್ರಿಯತಮನ ಮೇಲಿದ್ದ ಅತಿಯಾದ ವ್ಯಾಮೋಹ ಹಾಗೂ ಆತನ ಮಾತನ್ನು ನಂಬಿದ ಯುವತಿಯೊಬ್ಬಳು ತಾನು ಕೆಲಸ ಮಾಡುತ್ತಿದ್ದ ಪ್ರತಿಷ್ಠಿತ ಚಿನ್ನದ ಅಂಗಡಿಯಿಂದಲೇ ಭಾರಿ ಪ್ರಮಾಣದ ನಗದು ಮೌಲ್ಯದ ಒಡವೆಗಳನ್ನು ಕಳವು ಮಾಡಿ, ಕೊನೆಗೆ ಅದೇ ಪ್ರೇಮಿಯಿಂದ ಭೀಕರ ವಂಚನೆಗೆ ಒಳಗಾಗಿ ಪೊಲೀಸರ ಅತಿಥಿಯಾಗಿರುವ ಆಶ್ಚರ್ಯಕರ ಘಟನೆ ಗುಜರಾತ್ನ ಅಹಮದಾಬಾದ್ನಲ್ಲಿ ನಡೆದಿದೆ. ಕದ್ದ ಕೋಟ್ಯಂತರ ರೂಪಾಯಿ ಮೌಲ್ಯದ ಒಡವೆಗಳೊಂದಿಗೆ ಪ್ರೇಯಸಿಗೆ ವಂಚಿಸಿ ಪರಾರಿಯಾಗಿದ್ದ ಆಕೆಯ ಪ್ರಿಯತಮ ಹಾಗೂ ಕೃತ್ಯ ಎಸಗಿದ ಯುವತಿಯನ್ನು ಕ್ರೈಂ ಬ್ರಾಂಚ್ ಪೊಲೀಸರು ಜಂಟಿ ಕಾರ್ಯಾಚರಣೆಯಲ್ಲಿ ಬಂಧಿಸಿದ್ದಾರೆ.
ಬಂಧಿತ ಆರೋಪಿಗಳನ್ನು ಅಹಮದಾಬಾದ್ನ ನ್ಯೂ ನರೋಡಾ ನಿವಾಸಿ 38 ವರ್ಷದ ಹರ್ಷಿದಾ ರಾಜೇಂದ್ರಕುಮಾರ್ ಶೆಟ್ಟಿ ಹಾಗೂ ವಸ್ತ್ರಲ್ ಪ್ರದೇಶದ ನಿವಾಸಿ ಮಯೂರ್ ಅಶೋಕ್ಭಾಯ್ ಮಾಲಿ ಎಂದು ಗುರುತಿಸಲಾಗಿದೆ. ವಿಚ್ಛೇದಿತೆಯಾಗಿದ್ದ ಹರ್ಷಿದಾ ಶೆಟ್ಟಿ, ತನ್ನ ಪ್ರೇಮಿಯಾಗಿದ್ದ ಮಯೂರ್ ಮಾಲಿ ತನಗಾಗಿ ಹೆಂಡತಿಯನ್ನು ಬಿಟ್ಟು ಬಂದು ತನ್ನೊಂದಿಗೆ ಹೊಸ ಜೀವನ ಆರಂಭಿಸುತ್ತಾನೆ ಎಂಬ ಭ್ರಮೆಯಲ್ಲಿದ್ದಳು. ಈ ಹಿನ್ನೆಲೆಯಲ್ಲಿ ಇಬ್ಬರೂ ಒಟ್ಟಾಗಿ ಸೇರಿ ಈ ಭಾರಿ ಕಳವು ಪ್ರಕ್ರಿಯೆಯ ಸ್ಕೆಚ್ ಹಾಕಿದ್ದರು ಎನ್ನಲಾಗಿದೆ.
ಪ್ರಮುಖ ಮುಖ್ಯಾಂಶಗಳು:
- ಪ್ರಿಯತಮನೊಂದಿಗೆ ಹೊಸ ಜೀವನ ಆರಂಭಿಸಲು ಮಾಲೀಕರಿಗೇ ಕೋಟಿ ರೂಪಾಯಿ ನಾಮ ಹಾಕಿದ ಯುವತಿ ಬಂಧನ.
- ಗುಜರಾತ್ನ ಅಹಮದಾಬಾದ್ನ ನಿಕೋಲ್ ಪ್ರದೇಶದಲ್ಲಿರುವ ‘ಅಭೂಷಣ್ ಜ್ಯುವೆಲರ್ಸ್’ ಮಳಿಗೆಯಲ್ಲಿ ನಡೆದ ಕಳ್ಳತನ.
- ಕಳೆದ 11 ತಿಂಗಳಿನಿಂದ ಸೇಲ್ಸ್ವುಮನ್ ಆಗಿ ಕೆಲಸ ಮಾಡುತ್ತಿದ್ದ ಹರ್ಷಿದಾ ಶೆಟ್ಟಿಯಿಂದಲೇ ನಂಬಿಕೆ ದ್ರೋಹ.
- ಕದ್ದ ಮಾಲಿನೊಂದಿಗೆ ದೆಹಲಿಗೆ ಪರಾರಿಯಾಗಿದ್ದಾಗ ಪ್ರೇಯಸಿಯನ್ನೇ ವಂಚಿಸಿ ಬಹುತೇಕ ಒಡವೆ ಹೊತ್ತೊಯ್ದಿದ್ದ ಪ್ರೇಮಿ.
- ವಿವಿಧ ರಾಜ್ಯಗಳ 300 ಕ್ಕೂ ಹೆಚ್ಚು ಸಿಸಿಟಿವಿ ಕ್ಯಾಮೆರಾಗಳ ಪರಿಶೀಲನೆ ನಡೆಸಿ ಆರೋಪಿಗಳನ್ನು ಪತ್ತೆಹಚ್ಚಿದ ಕ್ರೈಂ ಬ್ರಾಂಚ್.
ಅಹಮದಾಬಾದ್ನ ನಿಕೋಲ್ ವೃತ್ತದ ಬಳಿಯ ಗ್ರಾವಿಟಿ ಶಾಪಿಂಗ್ ಮಾಲ್ನಲ್ಲಿ ದರ್ಶನ್ ಶಾ ಅವರಿಗೆ ಸೇರಿದ ‘ಅಭೂಷಣ್ ಜ್ಯುವೆಲರ್ಸ್’ ಹೆಸರಿನ ಚಿನ್ನಾಭರಣ ಮಳಿಗೆಯಿದೆ. ಇಲ್ಲಿ ಹರ್ಷಿದಾ ಕಳೆದ 11 ತಿಂಗಳಿನಿಂದ ಕೆಲಸ ಮಾಡುತ್ತಿದ್ದಳು. ಕಳೆದ ಮೇ 11 ರಂದು ಮಧ್ಯಾಹ್ನ ಮಳಿಗೆಯ ಮಾಲೀಕರು ಎಂದಿನಂತೆ ಊಟಕ್ಕೆ ತೆರಳಿದ್ದ ಸಂದರ್ಭವನ್ನು ಕಾಯುತ್ತಿದ್ದ ಹರ್ಷಿದಾ, ಪ್ರದರ್ಶನಕ್ಕಿಟ್ಟಿದ್ದ ಚಿನ್ನದ ಸರಗಳು, ಉಂಗುರಗಳು ಹಾಗೂ ಮಂಗಳಸೂತ್ರಗಳನ್ನು ತನ್ನ ಯೂನಿಫಾರ್ಮ್ ಬ್ಲೇಜರ್ ಮತ್ತು ಬ್ಯಾಗ್ನಲ್ಲಿ ಅತ್ಯಂತ ಚಾಣಾಕ್ಷತನದಿಂದ ಬಚ್ಚಿಟ್ಟುಕೊಂಡಿದ್ದಾಳೆ. ಬಳಿಕ ಸಹೋದ್ಯೋಗಿಗಳಿಗೆ ತುರ್ತು ಕೆಲಸದ ಹಿನ್ನೆಲೆಯಲ್ಲಿ ಮಾಲೀಕರು ರಜೆ ನೀಡಿದ್ದಾರೆ ಎಂದು ಸುಳ್ಳು ಹೇಳಿ ಮಳಿಗೆಯಿಂದ ಎಸ್ಕೇಪ್ ಆಗಿದ್ದಾಳೆ.
ಕಳ್ಳತನದ ತಕ್ಷಣವೇ ಹರ್ಷಿದಾ ತನ್ನ ಪ್ರಿಯತಮ ಮಯೂರ್ ಮಾಲಿ ಜೊತೆಗೂಡಿ ಆತನ ಬುಲೆಟ್ ಮೋಟಾರ್ ಸೈಕಲ್ನಲ್ಲಿ ರಾಜಸ್ಥಾನದ ಉದಯಪುರ ಹಾಗೂ ಜೈಪುರ ಮಾರ್ಗವಾಗಿ ದೆಹಲಿ ತಲುಪಿದ್ದಾಳೆ. ಅಲ್ಲಿನ ಹೋಟೆಲ್ ಒಂದರಲ್ಲಿ ವಾಸ್ತವ್ಯ ಹೂಡಿದ್ದಾಗ, ಹರ್ಷಿದಾ ಸ್ನಾನಕ್ಕೆ ತೆರಳಿದ್ದ ಸಮಯ ಸಾಧಿಸಿದ ಮಯೂರ್, ಪ್ರೀತಿಯ ನಾಟಕವಾಡಿ ತನಗಾಗಿಯೇ ಕಳವು ಮಾಡಿದ್ದ ಪ್ರೇಯಸಿಗೆ ದೊಡ್ಡ ದ್ರೋಹ ಬಗೆದಿದ್ದಾನೆ. ಆಕೆಯ ಪರ್ಸ್ನಲ್ಲಿ ಕೇವಲ 18 ಲಕ್ಷ ರೂಪಾಯಿ ಮೌಲ್ಯದ ಚಿನ್ನವನ್ನು ಮಾತ್ರ ಬಿಟ್ಟು, ಉಳಿದ 1.48 ಕೋಟಿ ರೂಪಾಯಿ ಮೌಲ್ಯದ ಒಡವೆಗಳೊಂದಿಗೆ ರಾತ್ರೋರಾತ್ರಿ ಪರಾರಿಯಾಗಿದ್ದನು. ಇತ್ತ ಮಾಲೀಕರು ದೂರು ನೀಡಿದ ಬೆನ್ನಲ್ಲೇ ತನಿಖೆ ಕೈಗೆತ್ತಿಕೊಂಡ ನಿಕೋಲ್ ಪೊಲೀಸರು ಮತ್ತು ದೆಹಲಿ ತಾಂತ್ರಿಕ ಕಣ್ಗಾವಲು ತಂಡವು ಸಿಸಿಟಿವಿ ಆಧರಿಸಿ ಮೊದಲು ಹರ್ಷಿದಾಳನ್ನು, ತದನಂತರ ತಲೆಮರೆಸಿಕೊಂಡಿದ್ದ ಮಯೂರ್ ಮಾಲಿಯನ್ನು ಬಂಧಿಸಿದ್ದು, ಸದ್ಯಕ್ಕೆ ಇಬ್ಬರಿಂದಲೂ ಒಟ್ಟು 22.54 ಲಕ್ಷ ರೂಪಾಯಿ ಮೌಲ್ಯದ ಒಡವೆಗಳನ್ನು ವಶಪಡಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ.
