ಅಹ್ಮದಾಬಾದ್ : ಗುಜರಾತಿ ಭಾಷೆಯ ಜನಪ್ರಿಯ ದೈನಿಕ ‘ಮಿಡ್‌ಡೇ’ ಪತ್ರಿಕೆಯ ಜೂನ್ 12ರ ಮೊದಲ ಪುಟದಲ್ಲಿ ಪ್ರಕಟವಾದ ಒಂದು ಜಾಹೀರಾತು ಈಗ ತೀವ್ರ ವಿವಾದಕ್ಕೀಡಾಗಿದೆ. ಅಹ್ಮದಾಬಾದ್‌ನ ಕಿಡ್ ಝಾನಿಯಾ ಮನರಂಜನಾ ಕೇಂದ್ರದ ಜಾಹೀರಾತು ಇದಾಗಿತ್ತು. ಜೂನ್ 13ರಿಂದ 15ರವರೆಗೆ ನಡೆಯುವ ತಂದೆಯಂದಿರ ದಿನಾಚರಣೆ ಸಂದರ್ಭದಲ್ಲಿ ಪ್ರಕಟಿಸಿದ ಈ ಜಾಹೀರಾತಿನಲ್ಲಿ, ಒಂದು ವಿಮಾನ ಕೆಳಮಟ್ಟದಲ್ಲಿ ಹಾರುತ್ತಾ, ನಗರವೊಂದರ ಕಟ್ಟಡದ ಮೇಲ್ಭಾಗದಲ್ಲಿ ಲ್ಯಾಂಡ್ ಆಗುತ್ತಿರುವ ದೃಶ್ಯವಿತ್ತು.
ಈ ಜಾಹೀರಾತಿನ ಉದ್ದೇಶ, ಕಿಡ್ ಝಾನಿಯಾದ ವಿಮಾನಯಾನ ಥೀಮ್‌ನ ಅನುಭವಗಳ ಬಗ್ಗೆ ಮಕ್ಕಳಿಗೆ ಪೈಲಟ್ ಅಥವಾ ಕ್ಯಾಬಿನ್ ಸಿಬ್ಬಂದಿಯಾಗಿ ಪಾತ್ರವಹಿಸಲು ಅವಕಾಶ ನೀಡುವುದೆಂಬುದನ್ನು ವಿವರಿಸುವಂತಿತ್ತು. ಆದರೆ, ಈ ಚಿತ್ರ ಓದುಗರಿಗೆ ತಲುಪಿದ ಕೆಲವೇ ಗಂಟೆಗಳಲ್ಲೇ ಅದೇ ದಿನ ಅಹ್ಮದಾಬಾದ್‌ನಲ್ಲಿ ನೈಜ ದುರಂತ ನಡೆದಿದೆ.
ಏರ್ ಇಂಡಿಯಾದ ಎಐ171 ಬೋಯಿಂಗ್ ವಿಮಾನವು, ಸರ್ದಾರ್ ವಲ್ಲಭಾಯಿ ಪಟೇಲ್ ವಿಮಾನ ನಿಲ್ದಾಣದಿಂದ ಹಾರಾಟ ಆರಂಭಿಸಿದ ಕೆಲವೇ ನಿಮಿಷಗಳಲ್ಲಿ ಪತನಗೊಂಡು, ವೈದ್ಯಕೀಯ ಕಾಲೇಜಿನ ಹಾಸ್ಟೆಲ್ ಕಟ್ಟಡದ ಮೇಲೆ ಬಿದ್ದಿತು. ಈ ದುರಂತದ ದೃಶ್ಯಗಳಲ್ಲಿ, ವಿಮಾನದ ಹಿಂಭಾಗ ಕಟ್ಟಡದ ಮೇಲೆ ಹರಡಿರುವ ರೀತಿಯು, ಮಿಡ್‌ಡೇ ಪತ್ರಿಕೆಯಲ್ಲಿ ಪ್ರಕಟವಾದ ಕಿಡ್ ಝಾನಿಯಾ ಜಾಹೀರಾತಿನ ಚಿತ್ರಕ್ಕೆ ಬಹಳಷ್ಟು ಹೋಲಿಕೆಯಾಗುತ್ತಿತ್ತು.
ಈ ಸಾದೃಶತೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಮತ್ತು ಭಾವನಾತ್ಮಕ ಪ್ರತಿಕ್ರಿಯೆಗಳಿಗೆ ಕಾರಣವಾಗಿದೆ. ಕೆಲವು ಮಂದಿ ಇದನ್ನು “ಅಪಶಕುನದ ಸೂಚನೆ” ಎನ್ನುತ್ತಿದರೆ, ಇತರರು ಇದನ್ನು “ದುರ್ಘಟನೆಯ ವೈಭವೀಕರಿಸಿದ ಚಿತ್ರಣ” ಎಂದು ನಿಂದಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆಯಾಗಿ ಜಾಹೀರಾತು ಕಂಪನಿಯು ಅಥವಾ ಪತ್ರಿಕೆಯು ಯಾವುದೇ ಸ್ಪಷ್ಟನೆ ನೀಡಿಲ್ಲ.
