ಇಸ್ರೇಲ್ ಹಾಗೂ ಹಮಾಸ್ ನಡುವಿನ ದ್ವಂಧ್ವದ ಪರಿಣಾಮವಾಗಿ ಸಂಪೂರ್ಣ ನಾಶವಾಗಿರುವ ಗಾಜಾ ಪಟ್ಟಣದಲ್ಲಿ, ಆಹಾರ ಸೇರಿದಂತೆ ಮೂಲಭೂತ ಅಗತ್ಯ ವಸ್ತುಗಳ ಲಭ್ಯತೆ ಕುಸಿದಿದೆ. ಈ ಭೀಕರ ಪರಿಸ್ಥಿತಿಯಲ್ಲಿ, ಭಾರತೀಯ ಮಾರುಕಟ್ಟೆಯಲ್ಲಿ ಕೇವಲ ₹5ಕ್ಕೆ ಲಭ್ಯವಿರುವ ಪಾರ್ಲೆ-ಜಿ ಬಿಸ್ಕತ್ ಗಾಜಾದಲ್ಲಿ ₹2,300ಕ್ಕಿಂತಲೂ ಹೆಚ್ಚು ಬೆಲೆಗೆ ಮಾರಾಟವಾಗುತ್ತಿರುವ ವರದಿ ವೈರಲ್ ಆಗಿದೆ.
ವೈರಲ್ ಪೋಸ್ಟ್‌ನಲ್ಲಿ, ಗಾಜಾದ ನಿವಾಸಿ ಮೊಹಮ್ಮದ್ ಜವಾದ್ ಎಂಬವರು ಪಾರ್ಲೆ-ಜಿ ಪ್ಯಾಕೆಟ್‌ಗಾಗಿ €24 (ಅಂದಾಜು ₹2,342) ರಷ್ಟು ಹಣವನ್ನು ಪಾವತಿಸಿರುವುದಾಗಿ ತಿಳಿಸಿದ್ದಾರೆ. ಈ ಬಿಸ್ಕತ್‌ಗಳು ಭಾರತ ಸರ್ಕಾರದಿಂದ ಮಾನವೀಯ ಸಹಾಯದ ಭಾಗವಾಗಿ ಉಚಿತವಾಗಿ ಕಳುಹಿಸಲ್ಪಟ್ಟಿದ್ದವು. ಆದರೆ, ಈ ಸಹಾಯ ವಸ್ತುಗಳನ್ನು ಹಮಾಸ್ ಉಗ್ರರು ಗಾಜಾದ ಬಡ ಜನರಿಗೆ ದುಬಾರಿ ದರದಲ್ಲಿ ಮರುಮಾರಾಟ ಮಾಡುತ್ತಿದ್ದಾರೆ ಎಂಬ ಗಂಭೀರ ಆರೋಪಗಳು ಹೊರಬಿದ್ದಿವೆ.
2023ರ ಅಕ್ಟೋಬರ್‌ನಲ್ಲಿ ಆರಂಭವಾದ ಯುದ್ಧದಿಂದಾಗಿ ಗಾಜಾದ ಆರ್ಥಿಕ ಪರಿಸ್ಥಿತಿ ಸಂಪೂರ್ಣ ಅಸ್ತವ್ಯಸ್ತವಾಗಿದೆ. ಮಾರ್ಚ್ 2 ರಿಂದ ಮೇ 19ರ ನಡುವೆ ಜನತೆ ತೀವ್ರ ಆಹಾರ ಬಿಕ್ಕಟ್ಟನ್ನು ಅನುಭವಿಸಿದ್ದರು. ಅಂತಾರಾಷ್ಟ್ರೀಯ ಒತ್ತಡದ ನಂತರ ಮಾತ್ರ ಕೆಲವು ಸಹಾಯವಾಣಿ ವಾಹನಗಳನ್ನು ಗಾಜಾಕ್ಕೆ ಪ್ರವೇಶಿಸಲು ಅವಕಾಶ ಮಾಡಿಕೊಡಲಾಯಿತು. ಆದರೆ, ಈ ಸಹಾಯವೂ ಸಾಕಾಗದ ಸ್ಥಿತಿಯಲ್ಲಿದೆ.
ಭಾರತದಿಂದ ಕಳುಹಿಸಲಾದ ಪಾರ್ಲೆ-ಜಿ ಬಿಸ್ಕತ್ ಅನ್ನು ದುಬಾರಿ ದರದಲ್ಲಿ ಮಾರಾಟ ಮಾಡುತ್ತಿರುವ ವಿಡಿಯೋಗಳು ಹಾಗೂ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, “ಇದು ಮಾನವೀಯ ಸಹಾಯವನ್ನು ದುರ್ಬಳಕೆ ಮಾಡಿರುವ ಘೋರ ಉದಾಹರಣೆ” ಎಂಬ ಪ್ರತಿಕ್ರಿಯೆ ಕೇಳಿಬರುತ್ತಿದೆ.
