ರಾಯ್ಪುರ (ಛತ್ತೀಸ್ಗಢ): ಆಘಾತಕಾರಿ ಘಟನೆಯೊಂದರಲ್ಲಿ, ತನಗೆ ಮೂರು ತಿಂಗಳ ಗರ್ಭಿಣಿಯನ್ನಾಗಿ ಮಾಡಿ ಮದುವೆಯಾಗಲು ನಿರಾಕರಿಸಿದ ಪ್ರಿಯಕರನನ್ನು 16 ವರ್ಷದ ಅಪ್ರಾಪ್ತ ಬಾಲಕಿಯೊಬ್ಬಳು ಚಾಕುವಿನಿಂದ ಕತ್ತು ಸೀಳಿ ಕೊಲೆ ಮಾಡಿರುವ ಘಟನೆ ಛತ್ತೀಸ್ಗಢದ ರಾಯ್ಪುರದಲ್ಲಿ ವರದಿಯಾಗಿದೆ. ಪೊಲೀಸರು ಮಂಗಳವಾರ (ಸೆ. 30) ಈ ಅಪ್ರಾಪ್ತ ಬಾಲಕಿಯನ್ನು ವಶಕ್ಕೆ ಪಡೆದಿದ್ದಾರೆ.
ಘಟನೆ ವಿವರ:
ಕೊಲೆಯಾದ ವ್ಯಕ್ತಿ ಬಿಹಾರ ಮೂಲದ ಮೊಹಮ್ಮದ್ ಸದ್ದಾಂ, ಇವರು ಅಭನ್ಪುರದಲ್ಲಿ ಎಂಎಸ್ ಎಂಜಿನಿಯರಿಂಗ್ ಅಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದರು. ಕೊಲೆ ಮಾಡಿದ ಅಪ್ರಾಪ್ತ ಬಾಲಕಿ ಬಿಲಾಸ್ಪುರದ ನಿವಾಸಿ. ಸೆಪ್ಟೆಂಬರ್ 28 ರಂದು, ತನ್ನ ಗೆಳೆಯನನ್ನು ಭೇಟಿ ಮಾಡಲು ರಾಯ್ಪುರಕ್ಕೆ ಬಂದಿದ್ದ ಬಾಲಕಿ, ನಗರದ ಸತ್ಕರ್ ಗಾಲಿಯಲ್ಲಿರುವ ಏವನ್ ಲಾಡ್ಜ್ನಲ್ಲಿ ಸದ್ದಾಂ ಜೊತೆ ತಂಗಿದ್ದಳು.
ಲಾಡ್ಜ್ನಲ್ಲಿ, ಬಾಲಕಿ ಮದುವೆಯಾಗುವಂತೆ ಒತ್ತಾಯಿಸಿದ್ದಾಳೆ. ಆದರೆ ಸದ್ದಾಂ ಆಕೆಯನ್ನು ಮದುವೆಯಾಗಲು ನಿರಾಕರಿಸಿದ್ದಲ್ಲದೆ, ಗರ್ಭಪಾತ ಮಾಡಿಸಿಕೊಳ್ಳುವಂತೆ ಒತ್ತಡ ಹೇರಿದ್ದ. ಈ ವಿಚಾರವಾಗಿ ಇಬ್ಬರ ನಡುವೆ ತೀವ್ರ ವಾಗ್ವಾದ ನಡೆದಿದ್ದು, ಪರಿಸ್ಥಿತಿ ವಿಕೋಪಕ್ಕೆ ಹೋಗಿದೆ.
ಕೊಲೆ ಮತ್ತು ತಪ್ಪೊಪ್ಪಿಗೆ:
ವಿವಾದದ ನಡುವೆ ಸದ್ದಾಂ ಚಾಕು ತೆಗೆದು ಬಾಲಕಿಗೆ ಬೆದರಿಕೆ ಹಾಕಿದ್ದ ಎಂದು ತಿಳಿದುಬಂದಿದೆ. ಸೆಪ್ಟೆಂಬರ್ 28ರ ತಡರಾತ್ರಿ, ಸದ್ದಾಂ ಮಲಗಿದ್ದಾಗ, ಬಾಲಕಿ ಅದೇ ಚಾಕುವನ್ನು ತೆಗೆದುಕೊಂಡು ಆತನ ಕತ್ತು ಸೀಳಿ ಕೊಲೆ ಮಾಡಿದ್ದಾಳೆ. ಬಳಿಕ ಆತನ ಮೊಬೈಲ್ ತೆಗೆದುಕೊಂಡು, ರೂಮ್ ಬಾಗಿಲು ಹಾಕಿ ತನ್ನ ಹುಟ್ಟೂರು ಬಿಲಾಸ್ಪುರಕ್ಕೆ ವಾಪಸ್ ಆಗಿದ್ದಾಳೆ.
ಮನೆಗೆ ತಲುಪಿದ ನಂತರ, ಬಾಲಕಿ ನಡೆದ ಘಟನೆಯನ್ನು ತನ್ನ ತಾಯಿಯ ಮುಂದೆ ಒಪ್ಪಿಕೊಂಡಿದ್ದಾಳೆ. ತಕ್ಷಣ ತಾಯಿ ಮಗಳನ್ನು ಕರೆದುಕೊಂಡು ಕೋನಿ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ.
ಪೊಲೀಸ್ ತನಿಖೆ:
ಬಿಲಾಸ್ಪುರ ಪೊಲೀಸರಿಂದ ಮಾಹಿತಿ ಪಡೆದ ರಾಯ್ಪುರ ಪೊಲೀಸರು ಏವನ್ ಲಾಡ್ಜ್ಗೆ ಭೇಟಿ ನೀಡಿ ಸದ್ದಾಂ ಅವರ ಶವವನ್ನು ವಶಕ್ಕೆ ಪಡೆದು ಆಸ್ಪತ್ರೆಗೆ ರವಾನಿಸಿದ್ದಾರೆ. ಮೃತನ ಫೋನ್ ವಶದಲ್ಲಿದೆ ಮತ್ತು ಬಿಹಾರದಲ್ಲಿರುವ ಸದ್ದಾಂ ಕುಟುಂಬವನ್ನು ಸಂಪರ್ಕಿಸಲು ಪ್ರಯತ್ನಿಸಲಾಗುತ್ತಿದೆ ಎಂದು ರಾಯ್ಪುರ ಪೊಲೀಸರು ತಿಳಿಸಿದ್ದಾರೆ.
ತನಿಖೆಯಲ್ಲಿ, ಮೃತ ಸದ್ದಾಂ ಮದುವೆಗೆ ನಿರಾಕರಿಸಿ ಗರ್ಭಪಾತಕ್ಕೆ ಒತ್ತಾಯಿಸಿದ್ದೇ ಈ ಕೊಲೆಗೆ ಕಾರಣ ಎಂದು ಪೊಲೀಸರು ಖಚಿತಪಡಿಸಿದ್ದಾರೆ. ಬಾಲಕಿ ವಿರುದ್ಧ ಪ್ರಕರಣ ದಾಖಲಿಸಿ, ವಿಚಾರಣೆ ಮುಂದುವರಿಸಿದ್ದಾರೆ.
